ރިޔާސީ އިންތިޚާބުގެ ތެރޭގައި، މިހާރުގެ ސަރުކާރަށް ތާއީދުކުރާ ބަޔަކު އިންޑިއާ ސިފައިން އުތުރު ތިލަފަޅުގައި ތިބިކަމަށް ބުނެ ވާހަކަތައް ފެތުރި ނަމަވެސް މިސަރުކާރު ފެށުނު އިރުވެސް އުތުރު ތިލަފަޅުގައި އިންޑިއާ ސިފައިންގެ އެއްްވެސް މީހަކު ނެތްކަން، މިސަރުކާރުގެ ޑިފެންސް މިނިސްޓަރ ޣައްސާނު މައުމޫނުވެސް ޔަޤީންކޮށްދެއްވައިފިއެވެ.

ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ޑިފެންސް މިނިސްޓަރ ޣައްސާނު މައުމޫނު ވިދާޅުވީ، ރައީސުލްޖުމްހޫރިއްޔާގެ ވައުދުފުޅާއި އެއްގޮތަށް ރާއްޖޭގައި ތިބި އިންޑިއާގެ ހުރިހާ ސިފައިން މިހާރު އަނބުރާ ފޮނުވާލެވިފައިވާ ކަމަށެވެ. އަދި އުތުރު ތިލަފަޅުގައި އިންޑިއާ ސިފައިންގެ އެއްވެސް މީހަކު ނެތްކަމުގައިވެސް މިނިސްޓަރ ޣައްސާނު މައުމޫނު ވިދާޅުވިއެވެ.

އެހެން ނަމަވެސް ފަހުން ޑިފެންސް މިނިސްޓަރ ޤައްސާނު މައުމޫނު ވިދާޅުވީ އެމަނިކުފާނު ދެންނެވީ، ކުރިން އެއްވެސް އިރެއްގައި އިތުރު ތިލަފަޅުގައި އިންޑިއާ ސިފައިން ނެތްވާހަކަ ނޫން ކަމަށެވެ. 

އެކަމާއު ގުޅޭ ގޮތުން އިތުރަށް ސުވާލު ދެންނެވުމުން ޑިފެންސް މިނިސްޓަރ ޣައްސާނު މައުމޫނު ވިދާޅުވީ، ކުރިން އިންޑިއާ ސިފައިން އުތުރު ތިލަފަޅުގައި ތިބި ކަމަށެވެ. އެހެން ނަމަވެސް ތިބީ ކިހާ ސިފައިންނެއް ކަމެއް އަދި އެސިފައިން ތިބީ ކިހާ މުއްދަތެއްގައި ކަމެއް ޑިފެންސް މިނިސްޓަރަކަށް ވިދާޅެއް ނުވެވުނެވެ. 

އެހެންނަމަވެސް ފަހުން އަދަދު ނޫހުން ސުވާލު ކުރުމުން މިނިސްޓަރ ވިދާޅުވީ، އެމަނިކުފާނު ވިދާޅުވީ، ކުރިން އިންޑިއާ ސިފައިން ތިބި ވާހަކަ ކަމަށާއި، ތިބި އަދަދު ޖެހޭނީ ބައްލަވާލައްވަން ކަމަށެވެ.

ނޫސްވެރިންގެ ބައްދަލުވުމުގައި ފޮރިން މިނިސްޓަރ މޫސާ ޒަމީރު ވިދާޅުވީ، ޔޫޓީއެފަކީ އިންޑިއާގެ ގްރާންޓް އެއިޑެއްގެ ދަށުން މިހާރުވެސް ހިނގަމުންދާ ޕްރޮޖެކްޓެއް ކަމަށެވެ. އެހެންވެ ޔޫޓީއެފާއި މެދު ޢަމަލުކުރަނީ އެގްރާންޓް އެއިޑް ޕްރޮޖެކްޓްތަކާއި މެދު ޢަމަލު ކުރަމުންދާ ގޮތެއްގެ މަތިން ކަމުގައި ފޮރިން މިނިސްޓަރ މޫސާ ޒަމީރު ވިދާޅުވިއެވެ.