ޔޫރަޕުގެ ކުލަބުތަކުގެ މެދުގައި ކުޅޭ ދެވަނައަށް އެންމެ ވަރުގަދަ މުބާރާތް ކަމުގައިވާ، ޔޫރޮޕާ ލީގުގެ ސެމީ ފައިނަލުގެ ދެވަނަ ލެގުގެ ފަހު ސިކުންތުގައި ބެޔާން ލެވަކޫސެން އިން ގޯލެއް ކާމިޔާބުކޮށް، އޭ އެސް ރޯމާއާ ދެކޮޅަށް ކުޅުނު މެޗު 2-2 އިން އެއްވަރުކުރުމާއެކު، ޔޫރަޕްގެ ކުލަބުތަކުގެ މެދުގައި މުބާރާތްތައް ކުޅެން ފެށިފަހުން، މެޗަކުން ބަލިނުވެ އެންމެ ގިނަ މެޗު ކުޅެފައިވާ ޓީމުގެ މަގާމު ލެވަކޫސެންއަށް ލިބިއްޖެއެވެ.

ލެވަކޫސެންއިން ބަލިނުވެ މި ސީޒަނުގައި މިހާތަނަށް 49 މެޗު ހަމަކޮށްފައިވާއިރު، 48 މެޗާއެކު މި ޝަރަފު ކުރިން އޮތީ ޕޯޗުގަލްގެ ބެންފީކާގެ އަތުގައެވެ. އެ ކުލަބުގެ ތަރީހީ ކާމިޔާބީއަކީ ޑިސެންބަރު 1963 އިން ފެބުރުވަރީ 1965 އަށް ހޯދާފައި އޮތް ކާމިޔާބެކެވެ. ނަމަވެސް ޒަމާނީ ފުޓުބޯޅައާއެކު ވާދަވެރިކަން މާބޮޑަށް އިތުރުވެފައިވަނިކޮށް، ޒަބީ އަލޮންސޯގެ ލެވަކޫސެންއިން މި ސީޒަނުގައި މިހާތަނަށް 40 މެޗުން މޮޅުވެފައިވާއިރު، އެއްވަރުވެފައިވަނީ 9 މެޗުންނެވެ.

ޔޫރޮޕާ ލީގުގެ ސެމީ ފައިނަލުގެ ދެވަނަ ލެގަށް އެ ކުލަބުން ނިކުތީ އިޓަލީގައި ކުޅުނު މެޗު 2-0 އިން ކާމިޔާބުކޮށް، ބޮޑު އެޑްވާންޓޭޖަކާއެކުއެވެ. ނަމަވެސް ބުރާސްފަތި ދުވަހުގެރޭ ލެވަކޫސެންގެ އަމިއްލަ ސަޕޯޓަރުންގެ ކުރިމަތީގައި ކުޅުނު މެޗުގައި ރޯމާ އިން އެ ޓީމަށް ލިބުނު ދެ ޕެނަލްޓީ ކާމިޔާބުކޮށް ދެ ގޯލުގެ ލީޑެއް ނެގިއެވެ. މި ގޯލުތައް ކާމިޔާބުކޮށްދީފައިވަނީ މެޗުގެ 43 ވަނަ މިނެޓާއި 66 ވަނަ މިނެޓުގައި، އާޖެންޓީނާއާއެކު ވޯލްޑް ކަޕް ކާމިޔާބުކުރި ލެއާންޑްރޯ ޕަރެޑޭޒްއެވެ.

މި މެޗުގައި ލެވަކޫސެންގެ ފުރަތަމަ ގޯލަކީ ރޯމާގެ ޑިފެންޑަރު ޖިއާންލޫކާ މަންޗިނީ އަތުން ބައިކޮޅަށް ވަތް ގޯލެކެވެ. ލެވަކޫސެންއިން މެޗު ހަމަހަމަ ކުރީ މެޗުގެ 90 ވަނަ މިނެޓުގައި ކުޅެން ނިކުތް ޖޮސިޕް ސްޓެނިސިޗް މެޗުގެ ފަހު ސިކުންތުގައި ކާމިޔާބުކުރި ގޯލަކުންނެވެ. މިއީ މެޗެއްގެ އިތުރު ވަގުތުގައި ލެވަކޫސެންއިން މި ސީޒަނުގައި ނަތީޖާ ބަދަލުކުރި 7 ވަނަ މެޗެވެ.

ލެވަކޫސެންއާއެކު ޔޫރޮޕާ ލީގުގެ ފައިނަލަށް ދަތުރުކޮށްފައިވަނީ އިޓަލީގެ އެޓަލާންޓާއެވެ. އެޓަލާންޓާ ފައިނަލުގެ ޖާގަ ކަށަވަރުކުރީ، ސެމީ ފައިނަލުގެ ދެވަނަ ލެގުގައި 3-0 އިން މާސޭ ބަލިކޮށްފައެވެ.