މިރޭ މާލެއަށް ކުރި ވިއްސާރައިގައި ބޯކޮށް ވާރޭ ވެހި ފެންބޮޑުވުމާއި ގުޅިގެން ސިފައިން ފެން ހިންދުމުގެ މަސައްކަތް ފަށައިފިއެވެ.

މިރޭ އިރާކޮޅުން ފެށިގެން މާލެއަށް ބޯކޮށް ވާރޭ ވެހުމުގެ ސަބަބުން މާފަންނުގެ ބައެއް ސަރަހައްދުތަކުގައި ވަނީ ފެންބޮޑުވެފައެވެ.

އެމްއެންޑީއެފުން ވިދާޅުވީ، ޕަމްޕްތައް ބޭނުންކޮށްގެން ފެން ހިންދުމުގެ މަސައްކަތުގައި މިހާރު ސިފައިން ހަރަކާތްތެރިވަމުން އަންނަ ކަމަށެވެ. މިރޭ މާލެއަށް ކުރިވިއްސާރައި، ބާރަށް ގުގުރުމުގެ ސަބަބުން މާލޭގެ ބައެއް ސަރަހައްދުތަކުން ކަރަންޓްގެ ޚިދުމަތްވެސް ކެނޑިގެން ދިޔައެވެ.

Advertisement

މޫސުމާއި ބެހޭ ޤައުމީ އިދާރާއިން ވަނީ، މިރޭގެ 23:00 އިންފެށިގެން، ފަތިހު 5:00 އާއި ހަމައަށް، ރ. އަތޮޅުން ފެށިގެން އައްޑު އަތޮޅާއި ދެމެދުގެ އަތޮޅުތަކަށް ވައިޓް އެލާޓް ނެރެފައެވެ. އަދި ހއ. އަތޮޅުން ފެށިގެން ނ. އަތޮޅާއި ހަމައަށް މިރޭގެ މެންދަމު 2:30 އާއި ހަމައަށް ވަނީ، ޔެލޯ އެލާޓް ނެރެފައެވެ.

ކުރިޔަށް އޮތް ދެދުވަހުވެސް ރާއްޖެއަށް މޫސުމް ގޯސްވާނެ ކަމަށް މޫސުމާއި ބެހޭ ޤައުމީ އިދާރާއިން ވަނީ ލަފާކޮށްފައެވެ.