މާލެއަށް މިރޭ ކުރަމުންދާ ވިއްސާރައިގައި، ހޮނު ގުގުރި ޖަހައި ބައެއް ސަރަހައްދު ތަކުން ކަރަންޓްގެ ޚިދުމަތް ކެނޑިއްޖެއެވެ.

މާލެއިން ކަރަންޓް ކެނޑިފައި ވަނީ، މައްޗަންގޮޅި އާއި މާފަންނުގެ ބައެއް ސަރަހައްދު ތަކުން ކަމުގައި މައުލޫމާތު ލިބިފައި ވެއެވެ. މާލެއަށް މިރޭގެ 22:27 އާއި 22:29 އަދި 22:31ގައި ވަނީ ވަރަށް ބާރަށް ގުގުރާފައެވެ. އެހެން ނަމަވެސް އެއްވެސް ތަނަކަށް ގެއްލުމެއް ލިބުނު ކަމުގެ ރިޕޯޓެއް އަދި ލިބިފައި ނެތް ނަމަވެސް، މާލޭގެ ބައެއް ސަރަހައްދުތަކުން ކަރަންޓްގެ ޚިދުމަތް ކެނޑުނެވެ.

ރާއްޖެއަށް މޫސުމް ގޯސްވެ މިރޭގެ 23:00 އާއި ހަމައަށް މޫސުމާއި ބެހޭ ޤައުމީ އިދާރާއިން އޮތީ މުޅި ރާއްޖެއަށް ވައިޓް އެލާޓް ނެރެފައެވެ. އަދި މިރޭގެ 22:30 އިން ފެށިގެން މެންދަމު 2:30 އާއި ހަމައަށް ނ އަތޮޅުންފެށިގެން އުތުރުގެ އަތޮޅުތަކަށް މޫސުމާއި ބެހޭ ޤައުމީ އިދާރާއިން ވަނީ، ޔެލޯ އެލާޓް ނެރެފައެވެ.