ދިވެހިރާއްޖޭގައި ޤާއިމްވެ ތިބި އިންޑިއާ ސިފައިންގެ ހުރިހާ އޮފިސަރުން މިހާރު އަނބުރާ ޤައުމަށް ގެންގޮސްފައިވާ ކަމުގައި އިންޑިއާއިން ބުނެފިއެވެ.

އިންޑިއާގެ ފޮރިން މިނިސްޓްރީން ހާމަކޮށްފައިވާ ގޮތުގައި، އިންޑިއާ ސިފައިން ރާއްޖެއިން އަނބުރާ ގެންދިއުމަށް ދެޤައުމުގެ ދެމެދުގައި ވެވިފައިވީ އެއްބަސްވުމާއި އެއްގޮތަށް، މިހާރު ވަނީ ރާއްޖޭގައި ތިބި އިންޑިއާ ސިފައިންގެ ހުރިހާ އޮފިސަރުން އަނބުރާ ޤައުމަށް ގެންގޮސް އޭގެ ބަދަލުގައި އެޤައުމުގެ އާއްމު މީހުން ރާއްޖެއަށް ގެނެސްފައެވެ. ދެސަރުކާރުގެ ދެމެދުގައި އެއްބަސްވެފައި ވަނީ ރާއްޖޭގައި ތިބި އިންޑިއާ ސިފައިން މެއި 10ގެ ކުރިން އަނބުރާ އިންޑިއާއަށް ގެންދިޔުމަށެވެ.

އިންޑިއާ ސިފައިންގެ ބަދަލުގައި ރާއްޖެއަށް ފޮނުވާފައި ވަނީ އާއްމު މީހުން ކަމުގައި ވީ ނަމަވެސް އެކަމާއި މެދު ސިޔާސީ ފަރާތްތަކުންނާއި އާއްމުން ސުވާލު އުފައްދައެވެ.

ރާއްޖޭގެ ފޮރިން މިނިސްޓަރ މޫސާ ޒަމީރު މިހާރު ހުންނެވީ ދިއްލީގައެވެ. އަދި އެމަނިކުފާނު ވަނީ މިއަދު އިންޑިއާގެ ފޮރިން މިނިސްޓަރާއިވެސް ބައްދަލު ކުރައްވާފައެވެ.