ދިވެހި ފުލުހުންގެ ނަމުގައި ރާއްޖެއިން ބޭރު ނަމްބަރުތަކަކުން ގުޅައިގެން ބަޔަކު އާއްމުންގެ އަތުން ފައިސާ ފޭރުމުގެ އަމަލުތައް ހިންގަމުންދާކަމުގައި ދިވެހި ފުލުހުންގެ ޚިދުމަތުން ވިދާޅުވެއްޖެއެވެ.

ފުލުހުންގެ ޚިދުމަތުން ވިދާޅުވީ، ދިވެހި ފުލުހުންގެ ޚިދުމަތުގެ ލޯގޯ ބޭނުންކޮށްފައިވާ ރާއްޖޭން ބޭރުގެ ވަޓްސްއަޕް ނަމްބަރަކުން، މީހުންނަށް ގުޅައިގެން ބޭންކު ކާޑުގެ މައުލޫމާތާއި ޒާތީ މައުލޫމާތު ހޯދުމަށް މަސައްކަތް ކުރަމުންދާކަމަށެވެ. މިގޮތުން ވަޓްސް އެޕުން ވީޑިއޯ ކޯލްކޮށް، ކޭޝް ކާޑާއި ކްރެޑިޓް ކާޑު ދެއްކުމަށާއި އައިޑީ ކާޑު ދެއްކުމަށް އެދެމުންދާ ކަމަށެވެ. އަދި އެގޮތަށް ވީޑިއޯ ކޯލް ކުރާ މީހުން ތިބެނީ މޫނު ފޮރުވައިގެން ކަންވެސް ފުލުހުންގެ ޚިދުމަތުން ފާހަގަކޮށްފައިވެއެވެ.

ފުލުހުންގެ ޚިދުމަތުން ވިދާޅުވީ، ރާއްޖެއިން ބޭރުގެ އެއްވެސް ނަމްބަރެއް ބޭނުންކޮށްގެން ފުލުހުން އާއްމުންނަށް ނުގުޅާނެ ކަމަށާއި އަދި އާއްމުންގެ ބޭންކު ކާޑުތަކުގެ މައުލޫމާތާއި ޒާތީ މައުލޫމާތު ދިނުމަށްވެސް ނޭދޭނެ ކަމަށެވެ. އަދި އެއީ ސްކޭމްއެއްކަމަށް ވުމާއި އެކު އެފަދަ ކޯލްތަކަށް ޖަވާބު ނުދިނުމަށް ދިވެހި ފުލުހުންގެ ޚިދުމަތުން ވަނީ އެދިފައެވެ.

ފުލުހުންގެ ޚިދުމަތުން ވިދާޅުވީ، އެޚިދުމަތުގައި ނަމުގައި ކުރާ ކޯލްތަކުގެ އިތުރުން، މޯލްޑިވުސް އިމިގްރޭޝަންގެ ނަމުގައިވެސް ރާއްޖެއިން ބޭރުގެ ނަމްބަރު ތަކުން ގުޅަމުންދާކަން ފާހަގަކޮށްފައިވާ ކަމަށެވެ. އެހެންކަމުން މިފަދަ ކަންކަމަށް އާައްމުން ސަމާލުކަން ދިނުމަށްވެސް ދިވެހި ފުލުހުންގެ ޚިދުމަތުން ވަނީ އާއްމުންނަށް އިލްތިމާސްކޮށްފައެވެ.