ރާއްޖޭގައި ހުއްދަ ނެތި ޓެކްސީ  ކުރާ ބިދޭސީންނާއި މެދު ފިޔަވަޅު އަޅާނެ ކަމުގައި ޓްރާންސްޕޯޓު މިނިސްޓްރީން ބުނެފިއެވެ.

އެމިނިސްޓްރީން މިހެން ބުނެފައި ވަނީ، ޓެކްސީ ޚިދުމަތާއި ގުޅިގެން އާއްމުން ފާޅުކުރަމުންދާ ކަންބޮޑުވުންތަކާއި  ގުޅޭ ގޮތުން އެމިނިސްޓްރީން ނެރެފައިވާ ނޫސް ބަޔާނެއްގައެވެ. 

ޓްރާންސްޕޯޓު މިނިސްޓްރީން ބުނީ، ޤަވާއިދާއި ޚިލާފަށް ޓެކްސީ ކުރަމުންދާ ބިދޭސީންނާއި މެދު ހަރުކަށި ފިޔަވަޅު އެޅުމަށް ނިންމާފައިވާ ކަމަށެވެ. މިގޮތުން ހުއްދަ ނެތި ޓެކްސީ ކުރާ ބިދޭސީން ޖޫރިމަނާ ކުރާނޭ ކަމުގައިވެސް އެމިނިސްޓްރީން ވަނީ ބުނެފައެވެ. މިގޮތުން، ހުއްދަ ނެތި ޓެކްސީ ކޮށްފި ނަމަ 500ރ އަދި ހުއްދަނެތި ޕްރައިވެޓް ހަޔަރ ދަތުރު ކުރާނަމަ 750ރ އިން ޖޫރިމަނާ ކުރާނެ ކަމުގައި އެމިނިސްޓްރީން ވަނީ ބުނެފައެވެ.

މިފިޔަވަޅު އަޅާނެ ކަމަށް ޓްރާންސްޕޯޓް މިނިސްޓްރީން ބުނެފައި މިވަނީ އެއާޕޯޓު ޓެކްސީ ކިއު އާއި ގުޅޭ ގޮތުން އާއްމު މީހަކު ސޯޝަލް މީޑިއާގައި ކަންބޮޑުވުންފާޅު ކުރުމާއި ގުޅިގެން އެމައްސަލައިގައ އަޅަންފެށި ފިޔަވަޅު ތަކުގެ ތެރެއިންނެވެ.

ޓްރާންސްޕޯޓް މިނިސްޓްރީން ބުނީ ރާއްޖޭގައި، ޓެކްސީ ކުރުމުގެ ހުއްދަ ދޫކުރެވޭނީ، ދިވެހިންނާއި ކައިވެނިކޮށްގެން ރާއްޖޭގައި ދިރިއުޅޭ ބިދޭސީންގެ ތެރެއިން ރެސިޑެންޓް ވިސާ ލިބިފައިވާ ބިދޭސީންނަށް ކަމަށެވެ.