ޔޫއެފާ ޗެމްޕިއަންސް ލީގުގެ ދެވަނަ ސެމީ ފައިނަލުގެ ދެވަނަ ލެގުގައި ބެޔާން މިއުނިކް 2-1 އިން ބަލިކޮށް، ރެއާލް މެޑްރިޑް މި މުބާރާތުގެ ފައިނަލަށް 18 ވަނަ ފަހަރަށް ދަތުރުކޮށްފިއެވެ.

ފުރަތަމަ ހާފުގެ ކުރީކޮޅު މެޗުގެ ކޮންޓްރޯލު ނަގައި، ގިނަ ވަގުތު ބޯޅަގެންގުޅުނީ ރެއާލް މެޑްރިޑެވެ. އަދި އެ ވަގުތުތަކުގައި ބެޔާންގެ ހަމަލާއެއް ފެނުނީ ކައުންޓަރ އެޓޭކުތަކުންވެ. ނަމަވެސް، ފުރަތަމަ ހާފުގެ މެދެއްހާ ހިސާބުން ބެޔާންއިން ކުޅުން ރަގަޅުކޮށް، މެޗުގެ ތެރެއަން ރަގަޅަށް ވަތްކަން ފާހަގަކުރެވުނެވެ.

މެޗުގައި ފުރަތަމަ ލީޑު ނެގީ ބެޔާންއެވެ. އެ ޓީމަށް ލީޑު ނަގައިދިނީ މެޗުގެ 68 ވަނަ މިނެޓުގައި އަލްފޮންސޯ ޑޭވިސްއެވެ. އޭގެ ފަހުން ރެއާލް މެޑްރިޑުން ވަނީ ނުރައްކާތެރި ގިނަ ހަމަލާތަކެއް ބެޔާންގެ ގޯލަށް ފޮނުވާލާފައެވެ. ނަމަވެސް މެނުއެލް ނޯޔާރ ވަނީ މި ހަމަލާތައް ހުޝިޔާރުކަމާއެކު ދިފާއުކޮށްފައެވެ.

މި ނަތިޖާއާއެކު، ބެޔާންގެ ކޯޗު، ތޯމަސް ޓުޗެލް އޭނާގެ ގޭމް ޕްލޭން ބަދަލުކޮށް، ބޮޑަށް ޑިފެންސް ކުރުމަށް ވިސްނާ، ލެރޯއީ ސާނޭ އާއި ހެރީ ކޭން އަދި ޖަމާލް މުސިއާލާ ބަދަލުކުރިއެވެ.

މެޗުގެ ފަހު ދިހަ މިނެޓަށް ދިޔަތަނާ، މެޑްރިޑުގެ ކޯޗު، ކާލޯ އެންޗެލޮޓީ ގެނައީ އެޓޭކިން ބަދަލުތަކެކެވެ. އޭނާ ކުޅެން ނެރުނީ ވަލްވަރްޑޭ އަދި ރޮޑްރީގޯގެ ބަދަލުގައި ހޮސޭލޫ އަދި ބްރާހިމް ދިއާޒްއެވެ. މި ބަދަލު ވެގެންދިޔައީ މެޗު ބަދަލުކުރި ފޮމިއުލާއަށެވެ.

ހޮސޭލޫ މެޗުގެ އޮއިވަރު ބަދަލުކޮށްލީ 4 މިނެޓުގެ ތެރޭގައެވެ. އޭނާގެ ފުރަތަމަ ގޯލަކީ މެޗުގެ 88 ވަނަ މިނެޓުގައި ބެޔާންގެ ކީޕަރު، ނޯޔާއަށް މި މެޗުގައި ހެދުނު ފުރަތަމަ މިސްޓޭކުގެ ބޭނުން ހިފައި ކާމިޔާބުކުރި ގޯލެކެވެ. ވިނީސިއަސް ޖޫނިއަރ ގޯލަށް ފޮނުވާލި ބޯޅައެއް ނޯޔާރ ހިފަން އުޅުމުގެ ތެރޭގައި އޭނާގެ އަތުން ވެއްޓުނުއިރު، ހޮސޭލޫ ހުރީ އެ ފުރުސަތަށް ބަލާށެވެ. އަދި ބޯޅަ ވެއްޓުމާއެކު ހޮސޭލޫ ވަނީ ފަސޭހަކަމާއެކު އެ ބޯޅަ ގޯލުގެ ތެރެއަށް ފޮނުވާލާ ނަތީޖާ ހަމަހަމަކޮށްފައެވެ.

އޭގެ 4 މިނެޓު ފަހުން، 1+90 ވަނަ މިނެޓުގައި ހޮސޭލޫ މެޑްރިޑަށް ލީޑު ނަގައިދިނީ ރުޑީގާ ގޯލު ކުރިމައްޗަށް ހުރަސްކުރި ބޯޅައަކުންނެވެ. މިއީ މި ސީޒަނުގައި އެސްޕެންޔޯލްއިން މެޑްރިޑަށް ބަދަލުވި ޖޮސޭލޫ އެ ޓީމަށް ކާމިޔާބުކޮށްދިން 16 ވަނަ ގޯލެވެ.

މުބާރާތުގެ ފައިނަލް އޮންނާނީ ޖޫން މަހުގެ 2 ވަނަ ދުވަހު، އިނގިރޭސިވިލާތުގެ ވެމްބްލީ ސްޓޭޑިއަމްގައެވެ.