ރައްޔިތުންގެ މަޖިލީހުގެ ރައީސް މުޙައްމަދު އަސްލަމް
ކޯރަމް ހަމަނުވެގެން އެންމެ ފަހުން މިއަދު މަޖިލީހުގެ ޖަލްސާ ނިންމާލައިފި
ރައްޔިތުންގެ މަޖިލީހުގެ ޖަލްސާ ބޭއްވޭ ވަރަށް މެމްބަރުން ހާޟިރު ނުވުމުން ރައްޔިތުންގެ މަޖިލީހުގެ މިއަދުގެ ޖަލްސާ ކުރިޔަށް ނުގެންގޮސް ނިންމާލައިފިއެވެ.
މިއަދުގެ ޖަލްސާގެ ކޯރަމް ހަމަވޭތޯ މަސައްކަތް ކުރެއްވުމަށްފަހު، މަޖިލީހުގެ ރައީސް މުޙައްމަދު އަސްލަމް ޖަލްސާ ނިންމަވާލެއްވިކަން އިޢުލާން ކުރެއްވީ، 11 ޖެހިފަހުންނެވެ. އޭގެ ކުރިން 9:30 އާއި 10:00 އަދި 11:00އަށް ވެސް ކޯރަމް ހަމަވާ ވަރަށް މެމްބަރުން މަޖިލީހަށް ހާޟިރުވޭތޯ މަޖިލީހުގެ ރައީސް މަސައްކަތްޕުޅު ކުރެއްވިއެވެ. އެހެން ނަމަވެސް ޖަލްސާ ނިންމަވާލެއްވި އިރު، މަޖިލީހުގެ ތަޅުމުގައި ތިއްބެވީ 10 މެމްބަރުންނެވެ. މަޖިލީހުގެ ކޯރަމަކީ 19 މެމްބަރުންނެވެ.
ރައްޔިތުންގެ މަޖިލީހުގައި މިވަގުތު މެޖޯރިޓީ އޮތީ އިދިކޮޅު ޕާޓީ އެމްޑީޕީއަށް ނަމަވެސް އައު ދައުރަށް މަޖިލީހަށް ވާދަކުރެއްވި، ނިމެމުން މިދާ ރައްޔިތުންގެ މަޖިލީހުގެ ގިނަ މެމްބަރުންނަށް ގޮނޑިއެއް ކާމިޔާބެއް ނުކުރެއްވުނެވެ. 19 ވަނަ ރައްޔިތުންގެ މަޖިލީހުގެ ދައުރު މިމަހުގެ 28އަށް ހަމަވާއިރު، މިދައުރުގެ އެންމެ ފަހު ޖަލްސާ ބޭއްވުމަށް ހަމަޖައްސާފައި ވަނީ މެއި މަހުގެ 13ވާ ހޯމަ ދުވަހުއެވެ. މަޖިލީހުގެ ޤަވާއިދުގައި ހިމަނާފައިވާ ގޮތުން މަޖިލީހުގެ އާއްމު ޖަލްސާތައް ބާއްވަމުން އަންނަނީ ހޯމަ އަންގާރަ އަދި ބުދަ ދުވަހުގައެވެ. މިއަދަކީ މިހަފްތާގެ ބުދަ ދުވަސްކަމަށް ވުމާއި އެކު ދެން ދެން އޮންނާނީ، މިދައުރުގެ މަޖިލީހުގެ އެންމެ ފަހު ޖަލްސާއެެވެ.