މިއަދު ވެލާނާ އިންޓަރނޭޝަނަލް އެއާޕޯޓުގައި، އެއާލައިންގެ ދިވެހި މުވައްޒަފެއްގެ ގައިގައި ތަޅައިގަނެ މާރާމާާރީ ހިންގި ބިދޭސީ މީހާ، ބަންދު މުއްދަތު ޖަހަން ކުރިމިނަލްކޯޓަށް ހާޟިރުކޮށްފައި ނުވާ ކަމުގައި އެކޯޓުން ބުނެފިއެވެ.

އެކޯޓުން މިރޭ ކުރި ޓްވީޓެއްގައި ބުނެފައި ވަނީ، އެއާޕޯޓްގައި މިއަދު މާރާމާރި ހިންގި ބިދޭސީ މީހާ އަށް ޝަރުތުކުރުމަށް ފަހު ‘ކްރިމިނަލް ކޯޓުން’ އޭނާ ދޫކޮށްލިކަމަށް ބުނެ، ބައެއް ނޫސްތަކުގައި ލިޔެފައިވަނީ ރަނގަޅު މަޢުލޫމާތެއް ނޫން ކަމަށެވެ. އަދި އެ ބިދޭސީމީހާގެ ބަންދާމެދު ގޮތެެއް ނިންމުމަށް އެ ކޯޓަށް ހާޒިރުކޮށްފައި ނުވާކަމުގައި ކުރިމިނަލް ކޯޓުން ވަނީ ބުނެފައެވެ.

ފުލުހުން ނޫސްވެރިންނަށް މައުލޫމާތު ދިނުމަށް ހަދާފައިވާ ވަޓްސްއެޕް ގުރޫޕުގައި ފުލުހުންގެ ފަރާތުން ލިޔެފައިވާ މެސެޖުގައި ބުނެފައި ވަނީ ބަންދުގެ މުއްދަތު އިތުރުކުރުމަށް އެމީހާ ކޯޓަށް ހާޟިރުކުރުމުން، ޝަރުޠުތަކަަކާއި އެކު ކޯޓުން އެމީހާ ދޫކޮށްލާފައިވާ ކަމަށެވެ. އެހެން ނަމަވެސް އެމީހާ ހާޟިރު ކުރީ ކޮން ކޯޓަކަށް ކަމެއް ފުލުހުން ބުނެފައެއް ނުވެއެވެ.

މާލެ ސަރަހައްދުގައި ހިނގާ ޖިނާޢީ މައްސަލަތަކުގައި ހިމެނޭ މީހުންގެ ބަންދު މުއްދަތު ޖެހުމަށް ހާޟިރު ކުރަމުން އަންނަނީ، މާލޭގައި ހުންނަ ކްރިމިނަލް ކޯޓަށް ކަމަށް ވާތީ، ފުލުހުން ކޮން ކޯޓެއް ކަމުގައި ނުބުނެ އޮތުމުން ބައެއް މީޑިއާތަކަށް ވަނީ އެކަމުގެ އޮޅުންތައް އަރާފައެވެ.

މިމާރާމާރީ ހިންގި މީހާއަކީ، އެމެރިކާގެ ރައްޔިތަކަށް ވާއިރު، ރާއްޖޭގައި ހުންނަ އެމެރިކާގެ އެމްބަސީ ހުންނަނީވެސް ހުޅުމާލޭގައި ކަމަށް ވާއިރު، ހުޅުމާލޭ މެޖިސްޓްރޭޓް ކޯޓަށް އެމީހާގެ ބަންދު މުއްދަތުޖަހަން ގެންދިޔައީ ކޮން އިޖުރާއަތެއްގެ މައްޗަށް ބިނާކޮށްގެން ކަމެއް ފުލުހުން ހާމައެއް ނުކުރެއެވެ.

މާރާމާރީ ހިންގި އެމެރިކާ މީހާގެ މައްސަލައިގެ ތެރެއަށް އެމެރިކާ އެމްބަސީން ނުފޫޒު ފޯރުވައިގެން އެމީހާ ފުރުވާލަން އުޅޭ ކަމަށް ބުނެ، އާއްމު ބައެއް ފަރާތްތަކުން އަންނަނީ ސޯޝަލް މީޑިއާގައި ނުރުހުންފާޅުކޮށް ތުހުމަތުތައް ކުރަމުންނެވެ.