މޯލްޑިވްސް އެއަރޕޯޓްސް ކޮމްޕެނީ ލިމިޓެޑުން ކުރިޔަށް ގެންދާ އެއަރޕޯޓް އެމަރޖެންސީ އެންޑް ރެެސިލިއަންސް ފޯރަމް ފަށައިފިއެވެ.

ކްރޮސްރޯޑުގައި އިއްޔެ ފެށި މިފޯރަމް ހުޅުއްވައިދެއްވީ މިނިސްޓަރ އޮފް ސްޓޭޓްފޯރ ޑިފެންސް މުއާޒް ޙަލީމްއެވެ. ފޯރަމް ފައްޓަވައި ދެއްވަމުން ދެއްކެވި ވާހަކަފުޅުގައި މުއާޒް ވިދާޅުވީ، އެއާޕޯތުގެ ސަލާމަތާއި ރައްކާތެރިކަމަށް މުހިއްމު ފިޔަވަޅުތަކެއް އެޅިފައި އޮތުމަކީ މުހިއްމު ކަމެއް ކަމަށެވެ. އަދި އެއާޕޯޓުގެ އޮޕަރޭޝަން ތަކުގައި، އެމަރޖެންސީ ހާލަތްތަކަށް އަވަހަށް އިޖާބަދިނުން ކަށަވަރު ކުރުމާއި، ވިލުންވެރިކަން ދެމެހެއްޓުމަށްޓަކައި، ސްޓޭކް ހޯލްޑަރުންގެ މެދުގައި ބަދަހިގުޅުމެއް އޮތުމުގެ މުހިއްމުކަންވެސް އޭނާ ފާހަގަކުރެއްވިއެވެ. 

މި ރަސްމިއްޔާތުގައި، އެމްއޭސީއެލްގެ މެނޭޖިންގ ޑައިރެކްޓަރ އައި ސީއީއޯ އިބްރާހީމް ޝަރީފް މުޙައްމަދު ދެއްކެވި ވާހަކަފުޅުގައި، ވެލާނާ އިންޓަރނޭޝަލް އެއާޕޯޓުގައި ޚިދުމަތްދެވޭ ފަސިންޖަރުންގެ އަދަދު އިތުރުވެ، މުޅި ޚިދުމަތުގެ ފެންވަރު ރަނގަޅު ކުރުމަށްޓަކައި އެއާޕޯޓުގައި ތަރައްޤީގެ މަޝްރޫޢުތައް ކުރިޔަށްދާއިރު، ހުރިހާ މަރުހަލާއެއްގައި ވެސް ސަލާމަތީ ކަންކަން ވަރުގަދަ ކުރެއްވުމަށް ޚާއްޞަ އިސްކަމެއް ދެއްވާ ކަމުގައި ވިދާޅުވިއެވެ.

Advertisement

ދެދުވަހުގެ މުއްދަތަށް ކުރިޔަށް ގެންދާ، އެއަރޕޯޓް އެމަރޖެންސީ އެންޑް ރެެސިލިއަންސް ފޯރަމް މިއަދު ނިމޭނެއެވެ. މިފޯރަމްގެ މަޤުޞަދަކީ، ވެލާނާ އިންޓަރނޭޝަނަލް އެއާޕޯޓުގައި، ސަލާމަތީ ކަންކަން ހަރުދަނާ ކުރުމާއި، ދިމާވެދާނެ ކުއްލި ހާލަތަކަށް އިޖާބަ ދިނުމުގައި މިހާރަށްވުރެ ބޮޑަށް ތައްޔާރުވެ، އެކަމަށް ގުޅުން ހުރި ހުރިހާ އިދާރާތަކުން އެކުގައި ކުރެވޭ މަސައްކަތްތައް ހަރުދަނާ ކުރުމެވެ. މި ފޯރަމްގައި ސެކިއުރިޓީ އާއި އެމަރޖެންސީ ޙާލަތްތަކުގައި އެކިއެކި މުއައްސަސާތަކުން އަދާކުރާ ދައުރާއި ބެހޭ ގޮތުން އެ މުއައްސަސާތަކުން މައުލޫމާތު ހުށައަޅައިދޭނެއެވެ. 

އެއަރޕޯޓް އެމަރޖެންސީ އެންޑް ރެެސިލިއަންސް ފޯރަމް 2024 އަކީ، އެމްއޭސީއެލްއިން ބާއްވާ މިފަދަ ފުރަތަމަ ފޯރަމެވެ.