މީހަކަށް ކުރެވޭ ކުށެއްގެ ނާޖާއިޒު ފައިދާ ނަގާ، އެއްވެސް މަޤްސަދެއްގައި ވީޑިޔޯކޮށް ޢާއްމުންގެ ތެރޭގައި ފަޟީހަތްކޮށް ހެދުމަކީ، އަޚްލާޤީ ގޮތުންނާއި އިޖްތިމާޢީގޮތުން ބަލާއިރު އެއްގޮތަކަށްވެސް ކޮށްގެންވާނޭ ކަންކަމެއްނޫން ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެ މަނިކުފާނު މިހެން ވިދާޅުވެފައި މިވަނީ، އިއްޔެ އެމަނިކުފާނުގެ ޕާޓީ ޕީއެންސީއަށް ނިސްބަތްވާ އިންތިޚާބީ މަޖިލިސް މެމްބަރު ޢިމްރާން ލަތީފްއަށް ތާއީދު ކުރާ ބައެއް ފަރާތްތަކުން ކުރީގެ ހޯމް މިނިސްޓަރ އިމްރާންގެ ކާރުގައި މީހެއްގެ ޕިކަޕުން ޖެހި ހިނގި އެކްސިޑެއްޓެއްގެ ތެރެއަށް ޢިމްރާން ލަތީފް ވަދެ، ހިންގި އަމަލުތަކެއްގެ ވީޑިއޯ އެއް ސޯޝަލް މީޑިއާގައި ޕޯސްޓްކޮށް ދައުރުކުރަމުންދާ ދަނޑިވަޅެއްގައެވެ.

އެވީޑިއޯ އާއި ގުޅިގެން ޝައިޚް އިމްރާއަށް ބައެއް ފަރާތްތަކުން ފާޑުކިޔާފައި ވާއިރު، އިމްރާން ލަތީފަށްވެސް ބައެއް ފަރާތްތަކުން ވަނީ ފާޑު ކިޔާފައެވެ. އެކްސިޑެންޓެއް ހިނގުމުން ފުލުހުންނަށް ރިޕޯޓްކުރުމަކީޤާނޫނީ ގޮތުން ލާޒިމް ކަމެއް ނަމަވެސް އެކްސިޑެންޓާއި ގުޅިގެން އާއްމުކޮށްފައިވާ ވީޑިއޯއިން ފެންނަ ގޮތުގައި އިންތިޚާބީ މެމްބަރު އިމްރާން ލަތީފް މަސައްކަތް ކުރައްވާފައި ވަނީ، އެ އެކްސިޑެންޓް ފުލުހުންނަށް ރިޕޯޓް ނުކޮށް މައްސަލަ ނިންމާލުމަށް ބާރު އަޅާ މޭރުމަކުންނެވެ. 

Advertisement

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުރައްވާފައިވާ ޕޯސްޓުގައި ވިދާޅުވީ، 

ކުށެއް ކޮށްފި މީހަކާއިމެދު ކަންކުރާނޭ ގޮތް ޤާނޫނުގައި ބަޔާންކޮށްފައި ވާކަމަށާއި، އެކަމަށް ފިޔަވަޅު އަޅަން މުއައްސަސާތަކާއި ޤާނޫނީ ނިޒާމު ޤާއިމް ކުރެވިފައިވާ ކަމަށެވެ.

ރައީސުލްޖުމްހޫރިއްޔާގެ މި ޕޯސްޓާއި ގުޅިގެން ވަރަށް ގިނަ ބަޔަކު ވަނީ އެމަނިކުފާނަށް ޝުކުރު އަދާކޮށް ތަޢުރީފްކޮށްފައެވެ. އޭގެ ތެރޭގައި އިދިކޮޅު ފަރާތްތަކާއި އެމަނިކުފާނަށް ތާޢީދު ކުރާ ފަރާތްތައްވެސް ހިމެނެއެވެ.

އޯގާތެރި އަމާން މުޖުތަމަޢެއް ޤާއިމްކޮށްދިނުމާއި، ރައްޔިތުންގެ މެދުގައި ހަމަހަމަ ކަމާއި ޢަދުލުވެރިކަން ޤާއިމްކޮށްދެއްވުމަކީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ އެންމެ މުހިއްމު ސިޔާސަތުކަމުގައި އެމަނިކުފާނު ގެންދަވަނީ ވިދާޅުވަމުންނެވެ.