އިލެކްޝަންސް ކޮމިޝަންގެ މެމްބަރުކަން ކޮށްފައިވާ ފަރާތްތަކަށްވެސް ރިޓަޔަރ ވެވޭގޮތަށް އިލެކްޝަންސް ކޮމިޝަނުން އެކުލަވާލި ޤަވާއިދު ބާޠިލްކޮށްފިއެވެ.

އެޤަވާއިދު ބާޠިލް ކުރުމާއި ގުޅޭ ގޮތުން، އިލެކްޝަންސް ކޮމިޝަންގެ މެމްބަރު ޙަސަން ޒަކަރިއްޔާ ވިދާޅުވީ، އެ ޤަވާއިދު ބާޠިލްކޮށްފައި ވަނީ، ފިނޭންސް މިނިސްޓްރީން އެންގުމުން ކަމަށެވެ.

މިގޮތުން އެ ޤަވާއިދުގައި ހިމަނާފައި ވަނީ އިލެކްޝަންސް ކޮމިޝަނުގެ މުވައްޒަފުންނަށް ރިޓަޔަރ ކުރެވޭ އުސޫލުގައި، ރިޓަޔަރ ވުމަށް އެދި ހުށައަޅާ މުވައްޒަފުގެ ޚިދުމަތުގެ މުއްދަތު ގުނާއިރު ކޮމިޝަންގެ މެމްބަރުކަމުގައި ހުރި މުއްދަތުވެސް ގުނާ ގޮތަށެވެ.

ކޮމިޝަނުން އެޤަވާއިދުގައި ހިމަނާފައި އޮތީ، އިލެކްޝަންސް ކޮމިޝަންގެ މެމްބަރުންކަމަށް ޢައްޔަނުކުރެވޭއިރު، ކޮމިޝަންގެ ދާއިމީ ވަޒީފާގައި ޚިދުމަތްކޮށްފައިވާ ފަރާތެއް ނަމަ ރިޓަޔަމެންޓް ދިނުމުގައި ގުނާ 15 އަހަރުގެ މުއްދަތުގައި ކޮމިޝަންގެ މެމްބަރެއްގެ ގޮތުގައި ހުރި މުއްދަތާއި އެކު ގުނާ ގޮތަށެވެ. އަދި ރިޓަޔަމެންޓް ދޭނީ މެމްބަރު ކަމުގެ މަޤާމުގެ ކުރިން އެންމެ ފަހުން އިލެކްޝަންސް ކޮމިޝަންގައި އަދާކުރެއްވި މަޤާމުގެ މުސާރަ އާއި ޢިނާޔަތްތަކަށް ބަލައިގެން ކަމުގައިވެސް ކޮމިޝަނުން ވަނީ އެޤަވާއިދުގައި  ހިމަނާފައެެވެ. އެހެން ނަމަވެސް ފިނޭންސް މިނިސްޓްރީން އިލެކްޝަންސް ކޮމިޝަނަށް އަންގާފައި ވަނީ އެގޮތަށް މުއްދަތު ނުގުނޭނެ ކަަމަށެވެ. އޭގެ ސަބަބަކަށް ފިނޭންސް މިނިސްޓްރީން ބުނަނީ ކޮމިޝަންގެ މެމްބަރު ކަމުގެ މަޤާމަކީ، މަޖިލީހުން ރުހުންދީގެން ޢައްޔަނު ކުރެވޭ މަޤާމަކަށް ވުމެވެ.