ކުރީގެ ހޯމް މިނިސްޓަރ އަދި އަދާލަތު ޕާޓީގެ ރައީސް ޝައިޚް އިމްރާން ޢަބްދުالله މިއަދު ދަތުރުކުރައްވަމުން ގެންދެވި ކާރުގައި ޕިކަޕެއް ޖެހި އެކްސިޑެންޓެއް ހިނގުމުން, އެހާދިސާގެ ތެރެއަށް ރައްޔިތުންގެ މަޖިލީހުގެ އިންތިޚާބީ މެންބަރު އިމްރާން ލަތީފް ވެދެވަޑައިގެން ހިންގެވި ޢަމަލުތައް އަދާލަތު ޕާޓީން ކުއްވެރިކޮށްފިއެވެ.

އަދާލަތު ޕާޓީން ބުނީ، އެ އެކްސިޑެންޓް ހިނގުމުން، ފުލުހުން އެ ސީނަށް ހާޒިރު ވަންދެން ޝައިޚް އިމްރާން އަދި ޕިކަޕް ދުއްވި ޑްރައިވަރ މަޑުކުރައްވައިގެން ތިއްބަވަނިކޮށް, ރައްޔިތުންގެ މަޖިލީހުގެ އިންތިޚާބީ މެންބަރު އިމްރާން ލަތީފް އެތަނަށް ހާޒިރުވެ, ޝައިޚް އިމްރާން އަށް ނިސްބަތްކޮށް ދޮގު ތުހުމަތުކޮށް, ޕިކަޕް ޑްރައިވަރަށް ނިސްބަތްކޮށް ނިކަމެތި ބަސް ބޭނުންކޮށް ސޯޝަލް މީޑިއާގައި ޕިކަޕް ޑްރައިވަރާއި ޝައިޚް އިމްރާން ފަޟީޙަތްކުރުމަށް މަސައްކަތްކޮށްފައިވާ ކަމަށާއި އެކަން އެޕާޓީގެ ފަރާތުން ކުއްވެރި ކުރާ ކަމަށެވެ.

ފުލުހުން އައުމުގެ ކުރިން އެސީންގެ ތެރެއަށް ވަދެ، ރައްޔިތުންގެ މަޖިލީހުގެ އިންތިޚާބީ މެންބަރު އިމްރާން ލަތީފް ވަނީ، ޕިކަޕް ޑްރައިވަރަކީ ނިކަމެތި ފަޤީރެއް ކަމަށްވާތީ، އޭނާއަށް ޝައިޚް އިމްރާން މަޢާފް ދެއްވުަމަށް އެދިވަޑަިއގަންނަވާ ކަމަށާއި އަދި ޝައިޚް އިމްރާން މަޢާފް ނުދެއްވާނެ ނަމަ، ޝައިޚް އިމްރާންގެ ކާރަށް ލިބުނު ގެއްލުން އެ މެމްބަރުގެ ޚަރަދުގައި މަރާމާތުކޮށް ދެއްވަން ބޭނުންވާ ކަމަށެވެ. އަދި އޭނާގެ އެހުށައެޅުން ވީޑިއޯކޮށް ވަނީ ސޯޝަލް މީޑިއާއަށްވެސް ލާފައެވެ.

އަދާލަތު ޕާޓީން ބުނީ، މަގުމަތީގައި ހިނގާ އެކްސިޑެންޓްތަށް ފުލުހަށް ރިޕޯޓް ކުރުމުގެ ޤާނޫނީ ޒިންމާއެއް އޮތްއިރު އެ ޒިންމާ އަދާކުރުމަށް ރައްޔިތުންގެ މަޖިލީހުގެ އިންތިޚާބީ މެންބަރަކު ހުރަސް އެޅުއްވުމާއި, ސިޔާސީގޮތުން ޚިޔާލު ތަފާތުވާ ފަރާތްތަކަށް މަގުމަތިން ދިމާކޮށް އާޑަ ފުރައްސާރަ ކުރުންފަދަ ކަންކަމަކީ, ޤާނޫނު ތަންފީޒު ކުރުމަށް ތަންފީޒީ އިދާރާތަކަށް ދަތިވާނެ އަދި މުޖުތަމަޢުގެ މަސަލަސްކަން ގެއްލުމަށް މެދުވެރިވެދާނެ ފަދަ ކަންކަން ކަމަށެވެ. މީގެ އިތުރުން، އަމިއްލައަށް ޤާނޫނު ތަންފީޒުކުރަން އުޅުމާއި ޤާނޫނުގެ ވެރިކަން ނެގެހެއްޓުމަށް ހުރަސް އެޅުމަކީ އާންމު ރައްޔިތުންގެ ކިބައިންވެސް އަދި ވަކިން ޚާއްސަކޮށް ޤާނޫނު ހެދުމުގެ ޒިންމާ ހަވާލުކުރެވޭ މެންބަރެއްގެ ކިބައިން ފެނިގެންވާނެ ކަންކަން ނޫންކަމުގައި އަދާލަތު ޕާޓީން ފާހަގަކޮށްފައިވެއެވެ.

މަގުމަތީގެ އެކްސިޑެންޓެއް ހިނގުމުން އެ އެކްސިޑެންޓެއް ފުލުހުންނަށް ރިޕޯޓު ނުކުރުމަކީވެސް ޤާނޫނީ ކުށެކެވެ. އަދި އެކްސިޑެންޓް ރިޕޯޓްކުރުމަށްފަހުގައި ދެފަރާތް ސުލުހަވުމަަށް، އަދި ލިބުނު ގެއްލުމެއްގެ ބަދަލާއި މެދު ދެފަރާތުން ވާހަކަ ދައްކައިގެން ގޮތެއް ކަނޑައެޅުމަށްވެސް ފުލުހުން ފުރުޞަތު ދެއެވެ. އެހެން ނަމަވެސް މިހާދިސާގައި ފާހަގަވެގެން ގޮސްފައި ވަނީ، އެމައްސަލަ ފުލުހުންނަށް ރިޕޯޓް ނުކުރުމަށް، ރައްޔިތުންގެ މަޖިލީހުގެ އިންތިޚާބީ މެންބަރު އިމްރާން ލަތީފް އެދިވަޑައިގަންނަވާ ފަދަ މޭރުމެކެވެ.