ޑިސްކައުންޓް ނުހިމަނާ ފޮނުވި ބިލްތައް ދައްކާފައިވާ ފަރާތްތަކަށް އަންނަ މަހު ޑިސްކައުންޓް ދިނުމަށް ނިންމާފައިވާ ކަމުގައި ސްޓެލްކޯގެ މެނޭޖިންގ ޑައިރެކްޓަރ ޙުސައިން ފަޙްމީ ވިދާޅުވެއްޖެއެވެ.

ރަމަޟާން މަހު އާއްމު ގޭބިސީތަކުން ބޭނުން ކުރާ ކަރަންޓާއި ފެނަށް ޑިސްކައުންޓް ދެއްވުމަށް ރައީސުލްޖުމްހޫރިއްޔާ ޑރ މުހައްމަދު މުޢިއްޒު އިއުލާނު ކުރެއްވި ނަމަވެސް، ރޯދަމަހު ފޮނުވި ކަރަންޓް ބިލްތަކުގައި ޑިސްކައުންޓް ހިމެނި އިރު، ރޯދަމަމަހުގެ 17 ދުވަސް އެބިލްތަކުގައި ހިމެނިފައި ނުވާތީ އާއްމުންގެ ކަންބޮޑުވުންތަކާއި ޝަކުވާތައް އިތުރުވެގެން ދިޔައެވެ. އެހެންވެ ރައީސުލްޖުމްހޫރިއްޔާގެ ވަޢުދުފުޅާއި އެއްގޮތަށް އެކަން ތަންފީޒް ކުރުމަށް އެމަނިކުފާނު ކަމާއި ގުޅޭ އިދާރާތަކަށް އެންގެވި އިރު، ކުންފުނިތަކުން އޮތީ އާއްމުންނަށް ބިލްތައް ފޮނުވައި އަދި ބައެއް ފަރާތްތަކުން ބިލްތައް ދައްކާފައެވެ. އެހެންވެ ނުދައްކާ ހުރި ބިލްތައް އަލުން ފޮނުވުމަށް ކުންފުނިތަކުން ވަނީ ނިންމާފައެވެ.

އެކަމާއި ގުޅޭ ގޮތުން ސްޓެލްކޯގެ މެނޭޖިންގ ޑައިރެކްޓަރ ހުސައިން ފަޙްމީ މިރޭ ވިދާޅުވީ، ރައީސުލްޖުމްހޫރިއްޔާ ރައީސް ޑރ. މުއިއްޒު ވަޢުދުވެވަޑައިގެންފައިވާ ގޮތަށް ނިމިދިޔަ ރަމަޟާންމަހު ބޭނުންކޮށްފައިވާ ކަރަންޓާއި ފެނުގެ ބިލްތައް އާންމު މަސްމަހުގެ ބިލްތަކަށްވުރެ ބޮޑު ނުވާނޭހެން ޑިސްކައުންޓު ދިނުމަށް ނިންމައި، އެކަން ސްޓެލްކޯއިން ވާނީ ރައީސުލްޖުމްހޫރިއްޔާގެ ވަޢުދުފުޅާއި އެއްގޮތަށް ތަންފީޒުކޮށްފައި ކަމަށެވެ. އެގޮތުން، ރަމަޟާން މަހުގެ ދުވަސްތައް ހިމެނޭހެން އެޕްރީލް މަހު ފޮނުވާފައިވާ ބިލްތަކުގައި ޑިސްކައުންޓް ހިމަނާފައިވާއިރު، ރަމަޟާން މަހުގެ ބާކީ ދުވަސްތައް ހިމެނޭހެން އެންމެ ފަހުން ތައްޔާރުކޮށްފައިވާ ބިލްތަކުގައިވެސް ޑިސްކައުންޓު ހިމެނުމަށްފަހު، މި ރޭގެ ނިޔަލަށް އެ ބިލްތައް ފޮނުވުމުގެ މަސައްކަތް ސްޓެލްކޯއިން ދަނީ ކުރަމުން ކަމުގައި ފަޙްމީ ވިދާޅުވިއެވެ.

Advertisement

ފަޙްމީ އިތުރަށް ވިދާޅުވީ، މީގެ އިތުރުން، ޑިސްކައުންޓު ހިމެނުމުގެ ކުރިން ދައްކާފައިވާ ބިލްތަކުން، ޑިސްކައުންޓު ހިމެނުމުން ފަރަޤުވާ އަދަދު ޖެހިގެން އަންނަ މަހުގެ ބިލްތަކުން އުނިކޮށްދޭން ވަނީ ހަމަޖައްސާފައި ކަމަށެވެ. އޭނާ ވިދާޅުވީ، ސަރުކާރުގެ ހަރުދަނާ ސިޔާސަތުތަކާއި އެއްގޮތަށް ރައްޔިތުން އެދޭފަދަ ފުރިހަމަ ޚިދުމަތެއް ފޯރުކޮށްދިނުމުގައްޔާއި، ރައްޔިތުންނަށް ލުއި ފަސޭހަކަން ގެނެސްދެވޭނެ ކޮންމެ ކަމެއް ކުރުމުގައި ސްޓެލްކޯ އަބަދުވެސް ދެމިއޮންނާނެ ކަމުގެ ޔަޤީންކަން އަރުވާ ކަމަށެވެ.