މިއަންނަ ހުކުރު ދުވަހުގެ ކުރިން ރާއްޖޭގައި ތިބި އިންޑިއާގެ ހުރިހާ ސިފައިން ރާއްޖެއިން ފައިބާ ނިމޭނެ ކަމުގައި ފޮރިން މިނިސްޓްރީން ވިދާޅުވެއްޖެއެވެ.

އެމިނިސްޓްރީ މިކަން ހާމަކުރައްވާފައި ވަނީ، އިއްޔެ ދިއްލީގައި ބޭއްވި، އިންޑިޔާ އާއި ދިވެހިރާއްޖޭގެ އިސްފަރާތްތައް ހިމެނޭ ހައިލެވެލް ކޮމިޓީގެ ބައްދަލުވުމަށް ފަހު ނެރުނު ކުރު ބަޔާނުގައެވެ.

ފޮރިން މިނިސްޓްރީގެ ބަޔާނުގައި ބުނެފައި ވަނީ، ރާއްޖޭގައި ތިބި އިންޑިއާ ސިފައިން ފޮނުވާލުމުގެ މަސައްކަތް ތާވަލާއި އެއްގޮތަށް ކުރިޔަށްދާ ކަމަށެވެ. މީގެ އިތުރުން ރާއްޖެއާ އިންޑިއާގެ ގުޅުން ބަދަހިކޮށް އަސްކަރީ ދާއިރާއިން ދެ ޤައުމުގެ ގުޅުން ބަދަހިކުރުމަށްވެސް މަޝްވަރާތައް ކޮށްފައިވާ ކަމުގައި ފޮރިން މިނިސްޓްރީން ވިދާޅުވެފައި ވެއެވެ.

ރައީސުލްޖުމްހޫރިއްޔާ ޑރ މުހައްމަދު މުޢިއްޒު ވެރިކަމަށް ވަޑައިގެންނެވުމަށް ރައްޔިތުންނަށް ވެވަަޑައިގެންނެވި މައިގަނޑު އެއް ވަޢުދަކީ، ރާއްޖޭގައި ތިބި އިންޑިއާ ސިފައިން ރާއްޖެއިން ބޭލުމެވެ. އެކަމަށް އެމަނިކުފާނު އެންމެ ފުރަތަމަ ދެއްވި ސުންގަނޑިއަކީ މާރިޗު 10 އެވެ. އެހެން ނަމަވެސް ދެ ސަރުކާރުގެ ދެމެދުގައި ކުރެވުނު މަތީ ފެންވަރުގެ މަޝްވަރާތަކަށް ފަހުގައި ފަހުން އެއްބަސް ވެވުނީ ރާއްޖޭގައި ތިބި އިންޑިއާގެ ހުރިހާ ސިފައިން މެއި 10ގެ ކުރިން ފޭބުމަށެވެ.

އިންޑިއާގެ ޔުނީފޯމް އެޅި ސިފައިން ރާއްޖެއިން ބޭލި ނަމަވެސް އިންޑިއާ ސިފައިން ޤާއިމްވެ ތިބި މަޤާމުގައިތަކުގައި އިންޑިއާގެ އާއްމުން ބޭއްތިއްބުމަށް ދިވެހި ސަރުކާރުން އެއްބަސްވެ އިންޑިއާ ސިފައިން ތިބި މަޤާމުތަކަށް މިހާރު ދަނީ އިންޑިއާގެ އާއްމު ބައެއް މީހުން ގެނެސް ބައިތިއްބަމުންނެވެ.

ރާއްޖޭގައި އިންޑިއާ ސިފައިން ޤާއިމްވެ ތިބީ، ހދ. ހަނިމާދޫ، ލ. ކައްދޫ، ސ. ގަމުގައެވެ.