ހުޅުމާލެ ފަޅުގައި އޮތް ޑްރެޖަރެއްގައި ހިނގި ހާދިސާއެއްގައި އަނިޔާވި މީހަކު މަރުވެއްޖެއެވެ.

ފުލުހުންގެ އިދާރާއިން ހާމަކުރައްވާފައިވާ ގޮތުގައި އެހާދިސާގައި މަރުވެފައި ވަނީ ބިދޭސީ މީހެކެވެ. ފުލުހުންގެ އިދާރާއިން ވިދާޅުވީ ހާދިސާގެ ރިޕޯޓް ފުލުހުންނަށް ލިބިފައި ވަނީ މިއަދުގެ 10:38ގައި ކަމަށެވެ. 

ފުލުހުންގެ އިދާރާިއން ވިދާޅުވީ، އެމީހާ ހުޅުމާލެ ހޮސްޕިޓަަލަށް ގެންދިޔައިރުވެސް މަރުވެފައިވާ ކަމަށް ހޮސްޕިޓަލުން ފުލުހުންނަށް މައުލޫމާތު ދީފައިވާ ކަމަށެވެ. އެހާދިސާގައި މަރުވެފައި ވަނީ އުމުރުން 30 އަހަރުގެ އިންޑިއާ މީހެއް ކަމުގައިވެސް ފުލުހުންގެ އިދާރާއިން ވިދާޅުވިއެވެ.

ފުލުހުންގެ އިދާރާއިން ވިދާޅުވީ، އެހާދިސާއާއި ގުޅިގެން ބަލަންޖެހޭ ކަންކަން ބަލަމުންދާ ކަމަށެވެ.

ހުޅުމާލެ ފަޅުތެރޭގައި އޮތް ޑްރެޖަރެއްގައި ހާދިސާއެއް ހިނގައި މީހަކު މަރުވި އިރު އެއީ ކޮންކަމަކަށް ބޭނުން ކުރަމުން އައި ޑްރެޖަރެއްކަމެއް ފުލުހުން ހާމަކޮށްފައެއް ނުވެއެވެ. ހުޅުމާލެ ފޭސް 3 ގެ ބިންހިއްކުމުގެ މަސައްކަތްތައް ކުރަމުންދާއިރު އެސަރަހައްދުގައި ޑްރެޖްތައް ބޭނުން ކުރަމުން ދިޔަ ނަމަވެސް ހާދިސާ ހިނގީ ބިންހިއްކުމުގެ މަސައްކަތް ކުރަމުން ދިޔަ ޑްރެޖަރެއްގައި ކަމެއް ސާފެއް ނޫނެވެ.