ސިހުރު ހަދާ ކަމަށް ތުހުމަތު ކުރެވެނު އުމުރުން 60 އަހަރުގެ މީހަކު ށ. ފުނަދޫއިން ހައްޔަރުކޮށްފައިވާ ކަމުގައި ފުލުހުންގެ އިދާރާއިން ވިދާޅުވެއްޖެއެވެ.

ފުލުހުންގެ އިދާރާއިން ވިދާޅުވީ، އެމީހާ ހައްޔަރުކޮށްފައި ވަނީ މިއަދުގެ ވަގުތެއްގައި ކަމަށެވެ. ނަމަވެސް އެމީހާ އާއި ބެހޭ އިތުރު ތަފްސީލެއް ފުލުހުން ހާމައެއް ނުކުރެއެެވެ.

ނޫން.އެމްވީއަށް އިތުބާރުހުރި ގޮތެއްގައި މައުލޫމާތު ލިބިފައިވާ ގޮތުގައި، ހައްޔަރުކޮށްފައި ވަނީ، ކޮޅުމަޑުލު ވިލުފުއްޓަށް ނިސްބަތްވާ، މާލޭގައި ދިރިއުޅޭ މީހެކެވެ. އޭނާ ފުނަދޫ މެޖިސްޓްރޭޓް ކޯޓަށް ހާޟިރުކޮށް ވަނީ ބަންދުގެ މުއްދަތު ޖަހާފައެވެ.

އޭނާގެ މައްޗަށް ފުނަދޫގެ ބައެއް މީހުން ތުހުމަތުކޮށްފައި ވަނީ، ރައްޔިތުންގެ މަޖިލީހުގެ ފުނަދޫ ދާއިރާއަށް ޕީއެންސީގެ ޓިކެޓްގައި އިންތިޚާބުވި މެމްބަރު، މުޙައްމަދު މަމްދޫހު މަރާލުމަށް އޭނާ ސިހުރުހަދައިދޭ ކަމުގެ ތުހުމަތެވެ. އަދި އޭނާ ހައްޔަރުކުރުމަށް ގޮވާލައި ފުނަދޫގެ ބައެއް އާއްމުން ވަނީ އިހްތިޖާޖުވެސް ކޮށްފައެވެ. މީގެ އިތުރުން މަމްދޫހުއަށް ސިހުރު ހަދައިކަންތައްތައްކޮށްފައިވާ ކަމަށް ބުނާ ލޯމޮހޮރުތަކެއްވެސް ބަޔަކު ހޯދައި އެކަމާއި ގުޅޭ މައުލޫމާތު ދަނީ ސޯޝަލް މީޑިއާގައި ދައުރު ކުރަމުންނެވެ.