ޔޯރޮޕާ ލީގުގެ ސެމީ ފައިނަލުގެ ފުރަތަމަ ލެގުގައި ބުރާސްފަތި ދުވަހުގެރޭ އޭއެސް ރޯމާއާ ދެކޮޅަށް އިޓަލީގައި ކުޅުނު މެޗު 2-0 އިން ކާމިޔާބުކޮށް، 22 އަހަރަށްފަހު ޔޫރަޕުގެ މުބާރާތެއްގެ ފައިނަލާ ކައިރިޔަށް ބެޔާން ލެވަކޫސެން ޖެހިލައިފިއެވެ.

މުޅި މެޗުގައި ވެސް ކައުންޓަރ އެޓޭކުތަކުގައި ލެވަކޫސެން ފެނިގެން ދިޔައީ ވަރަށް ނުރައްކާތެރި ޓީމެއްގެ ގޮތުގައެވެ. އެ ޓީމުގެ އެޓޭކިންގ ކުޅުންތެރިންގެ ބާރު ދުވެއްޔަކީ، ރޯމާގެ ޑިފެންސް ލައިނަށް މައިތިރި ކުރެވުނު ކަމެއް ނޫނެވެ. އެގޮތުން، ހުސް ޖާގައަށް ކުޅޭ ބޯޅަތައް، ނުރައްކާތެރި ހަމަލާތަކަކަށް ބަދަލު ކޮށްލާކަށް މާގިނަ ވަގުތެއް އެމީހުނެއް ނުނަގައެވެ.

ލެވަކޫސެންގެ ފުރަތަމަ ގޯލު ކާމިޔާބުކުރީ ފްލޮރިއަން ވާޓްޒްއެވެ. މިއީ ރޯމާގެ ފަހަތަށް ކުޅޭ ރިކް ކާސްޑޯޕްއަށް ހެދުނު ގޯހެއްގެ ބޭނުން ހިފައި، ލެވަކޫސެންއިން މެޗުގެ 28 ވަނަ މިނެޓުގައި ކާމިޔާބުކުރި ގޯލެކެވެ.

އެ ޓީމުގެ ދެވަނަ ގޯލު ކާމިޔާބުކުރީ މެޗުގެ 73 ވަނަ މިނެޓުގައި ރޮބާޓް އެންޑްރިޗްއެވެ. ރޯމާގެ ޕެނަލްޓީ އޭރިޔާގެ ބޭރުގައި ހުރެފައި އެންޑްރިޗް ފޮނުވާލި ބޯޅަ ގޯލުގެ ކަނާތް ފަރާތުގެ ކަނަށް ވަނީ ކީޕަރުގެ ބޯމަތިން ގޮހެވެ.

ލެވަކޫސެންގެ މި ތާރީހީ ސީޒަނުގައި މިހާތަނަށް އެއްވެސް މެޗަކުން ބަލިވެފައި ނުވާއިރު، އިޓަލީގައި ރޯމާ ބަލިކޮށް އެ ޓީމުން މިވަނީ މިހާތަނަށް ބަލިނުވެ 47 މެޗު ހަމަކޮށްފައެވެ.

ޔޫރޮޕާ ލީގުގެ ސެމީ ފައިނަލްގެ ދެވަނަ މެޗުގައި ބައްދަލުކޮށްފައިވަނީ ފްރާންސްގެ މާސޭ އާއި އިޓަލީގެ އެޓްލާންޓާއެވެ. މާސޭގައި ދަނޑުގައި ކުޅުނު މި މެޗު ވަނީ 1-1 އިން އެއްވަރުވެފައެވެ.

ސެމީ ފައިނަލުގެ ދެވަނަ ލެގުގެ މެޗުތައް އޮންނާނީ މެއި 10 ވަނަ ދުވަހުއެވެ.