ޑޮކްޓަރ އާމިނަތު ރަމްޝާގެ ވަކިވެ ދިޔުމާއި އެކު ޤައުމަށް ގެއްލިގެން އެދިޔައީ އިންސާނިއްޔަތަށް ޚިދުމަތް ކުރުމުގައި ރެޔާދުވާލު މަސައްކަތްކުރެއްވި ވާގިވެރިއެއް ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ކެންސަރު ބަލީގައި، ޑޮކްޓަރ އާމިނަތު ރަމްޝާ ނިޔާވުމާއި ގުޅިގެން އެކަމުގެ ހިތާމައިގައި ފޮނުއްވެވި ތަޢުޒިޔާގެ މެސެޖުގައެވެ.

އެކްސްގައި ރައީސުލްޖުމްހޫރިއްޔާ ލިޔުއްވި ތަޢުޒިޔާގެ މެސެޖުގައި ވިދާޅުވީ، 

Advertisement

ޚިދުމަތްތެރި އަދި މަޤްބޫލު ޑޮކްޓަރ އާމިނަތު ރަމްޝާ އަވަހާރަވި ޚަބަރު އަޅުގަނޑު އަޑުއެހީ ފުން ހިތާމައާއެކުގައި ކަމަށެވެ.

އަދި ޑޮކްޓަރ އާމިނަތު ރަމްޝާގެ ވަކިވެދިޔުމާއި އެކު ޤައުމަށް ގެއްލިގެން އެދިޔައީ ކުޅިވަރުގެ މައިދާނުގައި ރީތި ނަމޫނާ ދެއްކެވި މޮޅު އެތުލީޓެއް ކަމާއި އަދި އެއީ އިންސާނިއްޔަތަށް ޚިދުމަތް ކުރުމުގައި ރެޔާދުވާލު މަސައްކަތްކުރެއްވި ވާގިވެރިއެއް ކަމާއި، ބަލިމީހުންނާ ނުކުޅެދޭ މީހުންނަށް ހިތްވަރުދެއްވުމުގައި އޯގާތެރި އެހީތެރިއެއްކަން ރައީސުލްޖުމްހޫރިއްޔާގެ ތަޢުޒިޔާގެ މެސެޖުގައި ފާހަގަކުރައްވާފައިވެއެވެ.

އައިޖީއެމް ހޮސްޕިޓަލުގައި، ޚިދުމަތް ކުރެއްވި، އަދި ކޯވިޑް-19ގެ ޢާލަމީ ވަބާގެ ތެރޭގައި އާއްމުންނަށް ޚިދުމަތްކުރުމާއި ހޭލުންތެރިކަން އިތުރު ކުރެއްވުމުގައި ގިނަ މަސައްކަތްތަކެއް ކުރެއްވި، ޑރ. އާމިނަތު ރަމްޝާ ނިޔާވީ މިއަދު، ތައިލެންޑްގެ ހޮސްޕިޓަލެއްގައެވެ.