ރަމަޟާންމަހު ފެނާއި ކަރަންޓު ބިލަށް ލުޔެއް ދެއްވުމަކީ ރައީސްގެ ވަޢުދުފުޅެއް ނަމަވެސް އެމަނިކުފާނު ވަޢުދުވެވަޑައިގެންނެވި ގޮތަށް އެކަން ނުދާކަމުގައި ސަރުކާރުން ބުނެފިއެވެ.

ރައީސުލްޖުމްހޫރިއްޔާގެ އޮފީހުގެ ސީނިއަރ ސްޕޯކްސް ޕާސަން ހީނާ ވަލީދު ވިދާޅުވީ، ފެނާއި ކަރަންޓުބިލުތަކުން، ރައީސް މި އެދިވަޑައިގެންނެވި ގޮތަށް، ލުއިދެވިފައި ނުވާކަން ފާހަގަކުރެއްވޭތީ، އެކަން ޙައްލުކުރުމަށް ކަމާއިބެހޭ ފަރާތްތަކަށް ރައީސުލްޖުމްހޫރިއްޔާ މިއަދު އަންގަވާފައިވާ ކަމަށެވެ.

ރައީސުލްޖުމްހޫރިއްޔާ މިގޮތަށް އަންގަވާފައި މިވަނީ، ކަރަންޓާއި ފެންބިލްތައް ބޮޑުވެ އެކަމުގެ ޝަކުވާ ބޮޑުވެފައި ވަނިކޮށެވެ. ރައީސުލްޖުމްހޫރިއްޔާގެ ވަޢުދުފުޅާއި އެއްގޮތަށް އެކަން ފުރިހަމަ ނުކުރެއްވޭ ކަމުގައި ނޫސްވެރިން ފާހަގަކުރުމުން އާދީއްތަ ދުވަހު ބޭއްވި ނޫސްކޮންފަރެންސްގައި ސަރުކާރުން އެކަން ދިފާޢުވެސް ކުރިއެވެ.

Advertisement

އެހެން ނަމަވެސް ރައީސުލްޖުމްހޫރިއްޔާ ވިދާޅުވި ބަސްފުޅު އާއްމުންނަށާއި، ޔުޓިލިޓީޒް ރެގިއުލޭޓަރީ އޮތޯރިޓީއަށް ދޭހަވުމުގައި މަސައްލަތަކެއް ފާހަގަކުރެވިފައިވާކަން އެދުވަހުވެސް ނޫސްވެރިން ވަނީ ފާހަގަކޮށްފައެވެ.

ރަމަޟާންމަހު ބޭނުންކުރާ ފެނާއި ކަރަންޓުގެ ބިލަށް ލުޔެއް ދެއްވުމަށް ރައީސުލްޖުމްހޫރިއްޔާ ވަޢުދުވެ ވަޑައިގެންނެވި އިރު، ޔުޓިލިޓީޒް ރެގިއުލޭޓަރީ އޮތޯރިޓީން ކުންފުނިތަކަށް އަންގާފައި ވަނީ، މާރިޗުމަހުގެ ކަރަންޓް ބިލުގައި އެޑިސްކައުންޓް ހިމެނުމަށެވެ. އެހެން ނަމަވެސް މާރިޗު މަހުގެ ބިލުގެ ތެރެއަށް ވަދެފައި ވަނީ ރަމަޟާން މަހުގެ 13 ދުވަހެވެ.