މާރިޗު މަހުގެ ކަރަންޓް ބިލްތަކަށް ޑިސްކައުންޓް ދީފައި ވާއިރު، އެ ބިލްގައި ރަމަޟާން މަހުގެ ބޭނުންކުރި ކަރަންޓްގެ ބައެއް ހިމެނިފައި ނުވާތީ، ފެނަކައިގެ ކަސްޓަމަރުންނަށްވެސް އޭޕްރީލް މަހުގެ ކަރަންޓް ބިލަށް ޑިސްކައުންޓެއް ދޭނެ ކަމުގައި ފެނަކަ ކުންފުނިން ބުނެފިއެވެ.

ފެނަކަ ކޯޕަރޭޝަންގެ މެނޭޖިންގ ޑައިރެކްޓަރ މުއާޛު މުޙައްމަދު ރަޝީދު ވިދާޅުވީ، ޔުޓިލިޓީސް ރެގިއުލޭޓަރީ އޮތޯރިޓީން އަންގާ ގޮތެއްގެ މަތިން އެކުންފުނިންވެސް އަމަލު ކުރާނެ ކަމަށެވެ.

ރައީސުލްޖުމްހޫރިއްޔާގެ އޮފީހުގައި އާދީއްތަ ދުވަހު ބޭއްވި ނޫސްވެރިންގެ ބައްދަލުވުމުގައި، ފެނަކަ ކޯޕަރޭޝަންގެ މެނޭޖިންގ ޑައިރެކްޓަރ މުއާޛު މުޙައްމަދު ރަޝީދު ވިދާޅުވީ، މާރިޗު މަހުގެ ކަރަންޓް ބިލަށް ޑިސްކައުންޓް ދީފައި ވާއިރު، އެމަހުގެ ބިލްގައި ހިމެނިފައި ވަނީ ރަމަޟާން މަހު 13 ދުވަސް ކަމަށެވެ. އަދި ބިލް ހަދާ ތާރީޚުތަކަށް ބަލާއިރު ރަމަޟާން މަސް ވަކިން ބިލް ހެދުމަކީ އެކަމުގައި ދަތިތަކެއް އޮތް ކަމެއް ކަމުގައިވެސް މުއާޛު ވިދާޅުވިއެވެ.

ރައީސުލްޖުމްހޫރިއްޔާގެ ވަޢުދުފުޅަކީ، ރަމަޟާން މަހު ކަރަންޓް ބިލް އާއްމު މަސްތަކާއި އެއްވަރު ކުރުމުގެ ގޮތުން ގޭބިސީތަކަށް ޑިސްކައުންޓެއް ދިނުމެވެ. އާއްމުކޮށް ރަމަޟާން މަހަކީ، ގޭގޭގައި ކަރަންޓް ބޭނުން ކުރާ މިންވަރު އިިތުރުވެ ކަރަންޓް ބިލްތައް ބޮޑުވެގެންދާ މަހަކަށް ވާއިރު، އަހަރުގެ ތެރޭގައި އަންނަ އެންމެ ހޫނު ދުވަސްވަރާއި ރަމަޟާން މަސް ދިމާވެފައި ވާތީ، ކަރަންޓް ބިލްތައް އިތުރަށް ބޮޑުވެފައި ވެއެވެ.