Advertisement
ސްޓެލްކޯގެ މެނޭޖިންގ ޑައިރެކްޓަރ ޙުސައިން ފަޙްމީ --
މިމަހު ފޮނުވި ކަރަންޓް ބިލްތަަކަށް ޑިސްކައުންޓްދޭން ނިންމައިފި
ނިމިދިޔަ ރަމަޟާންމަހު ބޭނުންކޮށްފައިވާ ކަރަންޓަށް ޑިސްކައުންޓް ދިނުމަށް ސްޓެލްކޯއިން ނިންމާފައިވާ ކަމުގައި އެކުންފުނީގެ މެނޭޖިންގ ޑައިރެކްޓަރ ޙުސައިން ފަހުމީ ވިދާޅުވެއްޖެއެވެ.
ފަހުމީ މިހެން ވިދާޅުވީ، އެކްސްގައި ލިޔުއްވި ޕޯސްޓެއްގައެވެ.
ފަހުމީ ވިދާޅުވީ، ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ވަޢުދުފުޅާ އެއްގޮތަށް ނިމިދިޔަ ރަމަޟާންމަހު ބޭނުންކޮށްފައިވާ ކަރަންޓަށް ޑިސްކައުންޓް ދިނުމަށް ސްޓެލްކޯއިން ވަނީ ނިންމާފައި ކަމަށާއި، މިހާރު ފޮނުވާފައިވާ ބިލްތައް އެ ބަދަލާ އެއްގޮތަށް އަދާހަމަކުރުމަށްފަހު ވީއެންމެ އަވަހަކަށް ކަސްޓަމަރުންނަށް އަލުން ފޮނުވާނެކަމަށެވެ.
Advertisement
ފަހުމީ އިތުރަށް ވިދާޅުވީ، ސަރުކާރުގެ ހަރުދަނާ، އޯގާތެރި ސިޔާސަތުތަކާއި އެއްގޮތަށް ދިވެހި ރައްޔިތުންގެ ލާބައާއި މަންފާއަށް ކޮށްދެވެންހުރި ހުރިހާކަމެއް ކޮށްދިނުންމަތީ ދެމިތިބޭނެ ކަމުގެ ޔަގީންކަން ރައްޔިތުންނަށް އަރުވާ ކަމަށެވެ.
ކަރަންޓް ބިލްތައް ބޮޑުވުމުގެ މައްސަލައިގައި ރައްޔިތުންގެ ޝަކުވާ ބޮޑުވެފައި ވަނިކޮށް ޑިސްކައުންޓް ދިނުމަށް އަލުން ނިންމި ނަމަވެސް، ފޮނުވާފައިވާ ބިލްތައް ދައްކާފައިވާ ފަރާތްތަކާއި މެދު ޢަމަލު ކުރާނެ ގޮތެއް އެކުންފުނިން އަދި ހާމައެއް ނުކުރެއެވެ.
