އަދި އެމްޑީޕީ ވެރިކަމަށް ގެންނާނެ ކަމަށާއި، މަޖިލީހުގެ މެޖޯރިޓީ ނަގާތަންވެސް އަދި ފެންނާނެ ކަމުގައި، އެމްޑީޕީގެ ރައީސް ޢަބުދުﷲ ޝާހިދު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، މިރޭ ބޭއްވި އެމްޑީޕީގެ ޤައުމީ މަޖިލީގުގެ ބައްދަލުވުމަށްފަހުގައި، ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުންނެވެ.

ރިޔާސީ އިންތިޚާބާއި، އާއްމު އިންތިޚާބުގައި، އެމްޑީޕީއަށް ލިބުނު ބޮޑު ނާކާމިޔާބަށްފަހު އެޕާޓީއަށް ވަނީ ފާޑު ކިޔުންތައް ވަރަށް ބޮޑަށް އަމާޒު ވެފައެވެ. އަދި އެމްޑީޕީގެ ލީޑަރޝިޕް އިސްތިއުފާ ދިނުމަށްވެސް އާއްމު މެމްބަރުންގެ ތެރެއިން ބައެއް ފަރާތްތަކުން ގޮވާލާފައިވެއެވެ. އެހެން ނަމަވެސް ޤައުމީ މަޖިލީހުގެ ބައްދަލުވުމަށްފަހު، އެމްޑީޕީގެ ޗެއާޕާސަން ފައްޔާޒު އިސްމާޢީލާއި، އެމްޑީޕީގެ ރައީސް ޢަބުދުﷲ ޝާހިދު ވިދާޅުވީ، މިއީ އެބޭފުޅުން އިސްތިއުފާ ދެއްވަން ޖެހޭކަމަށް ދެކެވަޑައިނުގަންނަވާ ކަމަށެވެ.

މިރޭ ބޭއްވި ޤައުމީ މަޖިލީހުގައިވެސް މައިގަނޑު ގޮތެއްގައި ވާހަކަ ދައްކާފައި ވަނީ ބޮޑު ދެއިންތިޚާބުގައި އެމްޑީޕީއަށް ކުރިމަތިލާންޖެހުނު ނާކާމިޔާބީ އާއި ގުޅޭ ގޮތުންނެވެ.

ނޫސްވެރިންގެ މިބައްދަލުވުމުގައި އެމްޑީޕީގެ ޗެއާޕަރސަން ފައްޔާޒް އިސްމާޢީލް ވިދާޅުވީ، މަޖިލިސް އިންތިޚާބުން ބަލިވި ސަބަބުތައް ދެނެގަތުމަށް އެކަށީގެންވާ ދިރާސާއެއް ހައްދަވާނެ ކަމަށެވެ. އަދި ކުރިޔަށް އޮތްތަނުގައި ޕާޓީ ވަރުގަދަ ކުރެއްވުމަށް އިތުރު ގިނަ މަސައްކަތްތައް ކުރައްވާނެ ކަމުގައިވެސް ފައްޔާޒު ވިދާޅުވިއެވެ.

ފައްޔާޒު ވިދާޅުވީ، ޤައުމީ މަޖިލީހަށް ހުށައެޅިގެން ދިޔައީ، އެމްޑީޕީގެ އާއްމު މެމްބަރުންނާއި އާއްމު ދިވެހިރައްޔިތުންނާއި މަޝްވަރާކުރެވިގެން، އެމްޑީޕީ ކުރިޔަށް އޮތް ތަނުގައި ބައްޓަން ކުރާނެ ގޮތުގެ މަސައްކަތްތައް ކުރުން ކަމަށެވެ. މިގޮތުން ކުރެވޭ ދިރާސާގެ އަލީގައިކުރިޔަށްދާން ނިންމުނު ކަމުގައިވެސް ފައްޔާޒު ވިދާޅުވިއެވެ.

އެމްޑީޕީން މިރޭ ބޭއްވި ޤައުމީ މަޖިލީހުގެ ބައްދަލުވުމަކީ، ހުސްވި މަހުގެ 21 ވަނަ ދުވަހު ބޭއްވި އާއްމު އިންތިޚާބުގައި އެމްޑީޕިއަށް ކުރިމަތިވި ބޮޑު ނާކާމިޔާބަށް ފަހު އެޕާޓީން ބޭއްވި ޤައުމީ މަޖިލީހުގެ ފުރަތަމަ ބައްދަލުވުމެވެ.