ލޯންޗެއްގައި އެކަނި މާލެ އައި ކުޑަކުއްޖާ ހޯދައިފިއެވެ.

މެދުރާއްޖެތެރޭގެ ރަށަަކަށް ނިސްބަތްވާ އުމުރުން 14 އަހަރުގެ ކުޑަ ފިރިހެން ކުއްޖާ ހޯދާފައި ވަނީ ހުޅުމާލެއިން ކަމަށް، އެކުޑަކުއްޖާ ނިސްބަތްވާ ރަށުން މައުލޫމާތު ލިބިފައިވެއެވެ. އެހެން ނަމަވެސް ކުޑަކުއްޖާ އާއި ބެހޭ ގޮތުން ފުލުހުން މިހާތަނަށް އެއްވެސް މައުލޫމާތެއް މީޑިއާއަށް ހާމަކޮށްފައެއް ނުވެއެވެ.

ކުޑަކުއްޖާގެ މައުލޫމާތު އެނގޭ ފަރާތަކުން ބުނި ގޮތުގައި ގްރޭޑް-9ގައި ތަޢުލީމު ހާސިލްކުރަމުން އައި އެކުއްޖާ އެކަނި ލޯންޗެއްގައި ހުޅުމާލެއަށް އައިސްފައި ވަނީ ރޭގައެވެ. އެކުއްޖާ މާލެ އައީ އޭނާ ލޯބިވެގެން އުޅޭ ކުޑަކުއްޖާއަށް އޭނާގެ އާއިލާގެ ތެރެެެއިން އަނިޔާ ލިބޭކަމަށް ބުނެފައިވާތީ ކަމަށް ވާހަކަ ފެތުރިފައިވާކަމުގައިވެސް އެރަށުން މައުލޫމާތު ދިން ފަރާތުން ބުންޏެވެ.

އާއިލާ ރޫޅުމުގެ ސަބަބުން އެކަމުގެ ނަފްސާނީ އަސަރުތައް ކޮށްފައިވާ ކުޑަކުއްޖާ ހުޅުމާލެއަށް އައީ، މ އަތޮޅުގެ ރިޒޯޓެއްގެ ލޯންޗެއް ހުއްދަނެތި ނަގައިގެންނެވެ. ފުލުހުންގެ އިދާރާއިން ވިދާޅުވީ، މ އަތޮޅުގެ ރަށަކުން ގެއްލުނު ކަމަށް ރިޕޯޓް ކުރި ލޯންޗެއް ހުޅުމާލޭ ފަޅުތެރޭގައި އޮއްވައި ފެނިފައިވާ ކަމަށާއި އެމައްސަލަ ފުލުހުން ބަލަމުންދާ ކަމަށެވެ. އެހެން ނަމަވެސް އެކަމާއި ގުޅޭ ގޮތުން ފުލުހުންގެ އިދާރާއިން އިތުރު ތަފްސީލެއް ހާމަކޮށްފައެއް ނުވެއެވެ.

އުމުރުން 18 އަހަރު ނުފުރޭ ކުޑަކުދިން ކުރާ ކުށްތަކުގެ ޚަބަރާއި މައުލޫމާތު ގެނެސްދިނުމުގައި ކުއްޖާގެ އައިޑެންޓިޓީ ހާމަކުރުމަކީ، ޤާނޫނީ ކުށެކެވެ.