ދެކުނުގެ ރަށެއްގައި ކުޑަ އަންހެން ކުއްޖަކަށް ޖިންސީ ގޯނާ ކުރި މައްސަލައެއް ގުލުހުން ބަލަން ފަށައިފިއެވެ.

ފުލުހުންގެ އިދާރާއިން ވިދާޅުވީ، ދެކުނުގެ އަތޮޅެއްގައި 12 އަހަރުގެ ކުޑަ އަންހެން ކުއްޖަކަށް މީހަކު ޖިންސީ ގޯނާ ކުރުމުގެ މައްސަލައަށް އާދިއްތަ ދުވަހު ހުށައަޅާފައިވާ ކަމަށެވެ. އަދި އެމައްސަލަ ފުލުހުން ގެންދަނީ ތަޙްޤީޤު ކުރަމުން ކަމުގައިވެސް ފުލުހުންގެ އިދާރާއިން ވަނީ ވިދާޅުވެފައެވެ.

ދެކުނުގެ ރަށަކު އެފަދަ މައްސަލައެއް ރިޕޯޓްކޮށްފައިވާކަން ފުލުހުން ހާމަކޮށްފައި ވަނީ، އެކަމުގައި ތުހުމަތު ކުރެވޭ މީހާ ހައްޔަރުކޮށްފައި ނުވާތީ އެކަމާއި ދެކޮޅަށް އެރަށުގައި އާއްމުން ނުކުމެ އިހްތިޖާޖުކުރަން ފެށުމުންނެވެ.

ކުޑަކުދިންގެ ޙައްޤުތައް ރައްކާތެރި ކުރުމާއި ގުޅޭ ޤާނޫނުގެ ދަށުން، ކުޑަކުއްޖާއަކީ ކާކުކަން އެނގޭ ގޮތަށް އެއްވެސް މައުލޫމާތެއް ހާމަ ކުރުމަކީ ޤާނޫނުން މަނާކޮށްފައިވާ ކަމެކެވެ. އެހެންވެ މިފަދަ މައްސަލަތަކުގެ ތަފްޞީލެއް ފުލުހުން މީޑިއާތަކަށް ޙިއްޞާއެއް ނުކުރެއެވެ.