ތުލުސްދޫއަށް ފަތުރުވެރިއެއްގެ ގޮތުގައި އައިސް ހުރި އިޒްރޭލު މީހަކު އެރަށުން ބާލައިފިއެވެ.

އެ މީހާއަކީ، ކުރިން ބުކިންގ ހެދުމަކާއި ނުލައި ތުުލުސްދޫއަށް އެތެރެވި އިޒްރޭލުގެ އަންހެން ޓޫރިސްޓެއްކަން އެނގިފައިވެއެވެ.

އިޒްރޭލުގެ އެ އަންހެންމީހާއަށް ތުލުސްދޫއިން ފޭބުމަށް އެންގީ އާއްމު ރައްޔިތުންގެ ތެރެއިން ބައެކެވެ. އޭނާއަކީ އިޒްރޭލު މީހެއްކަން ތުލުސްދޫގެ އާއްމުންނަށް އެނގުނީ، އޭނާ ތުލުސްދޫގައި ހުރެ ސޯޝަލް މީޑިއާ ޕްލެޓްފޯމްތަކުގައި ލައިވްކޮށް އޭނާ ހުރީ ތުލުސްދޫގައި ކަމާއި އޭނާއަކީ އިޒްރޭލުގެ ރައްޔިތެއްކަން އަމިއްލައަށް ހާމަކުރުމާއި ގުޅިގެންނެވެ.

އޭނާ ތުލުސްދޫއިން ބޭލުމަށް ރައްޔިތުން ޑިމާންޑް ކުރުމުން، އޭނާ ހުރި ގެސްޓް ހައުސްގެ ފަރާތުން ވަނީ އޭނާ އެރަށުން ލޯންޗެއްގައި ފުރުވާލާފައެވެ. ސޯޝަލް މީޑިއާގައި އިޒްރޭލުގެ އެއަންހެން މީހާ ވަނީ، އޭނާއަށް ވަގުތުން ފުރައިގެން ދިޔުމަށް އަންގައި މަރުގެ އިންޒާރު ދިންކަމަށް ބުނެ ސޯޝަލް މީޑިއާގައި ޕޯސްޓެއް ކޮށްފައެވެ.

އޮކްޓޫބަރު 7 ގެ ފަހުން އިޒްރޭލު ސިފައިން ގައްޒާގައި ހިންގަމުންގެންދާ ޤަތުލު އާއްމުތަކާއި ގުޅިގެން، އިޒްރޭލުގެ ރައްޔިތުން ފަތުރުވެރިންގެ ގޮތުގައި ތުލުސްދޫއަށް އެތެރެވުމަށް އެރަށުގެ ރައްޔިތުން ނުރުހެއެވެ. އަދި ދިވެހިންގެ ތެރެއިންވެސް ގިނަ ބަޔަކު ވަނީ އިޒްރޭލު ޕާސްޕޯޓު ރާއްޖޭގައި މަނާކުރުމަށް ގޮވާލާފައެވެ.

ތުލުސްދޫ އިން ވާހަކަދެއްކި އެހެން މީހަކު ބުނެފައިވާ ގޮތުގައި، އިޒްރޭލު މީހާ މަސައްކަތްކޮށްފައި ވަނީ، ވިކްޓިމް ކާޑު ކުޅެގެން މީޑިއާތަކުގެ ސުރުޚީއަށް އަރާށެވެ. އޭނާ ތުލުސްދޫގައި ހުންނަތާ ދުވަސްތަކެއް ފަހުން އަމިއްލައަށް ސޯޝަލް މީޑިއާގައި އޭނާއަކީ އިޒްރޭލު މީހެއްކަމާއި އޭނާ ހުރީ ރާއްޖޭގައި ކަން ހާމަކުރުމުގެ ބޭނުމަކީވެސް ހަމަނުޖެހުމެއް އުފައްދައިގެން ބައިނަލްއަޤުވާމީ މީޑިއާތަކުގެ ސުރުޚީއަށް އެރުން ކަމުގައި ތުހުމަތު ކުރެވޭ ކަމުގައި އޭނާ ބުންޏެވެ.

ރާޅާ އެޅުމަށް އިޒްރޭލުގެ ފަތުރުވެރިން އާއްމުކޮށް ތުލުސްދޫއަށް އަންނައިރު، ގެސްޓަހައުސްތަކަށް ކުރިން ބުކިން ހެދުމަކާއި ނުލައި އެމީހުން އައިސްއުޅެއެވެ. އަދި 2014 ވަނަ އަހަރު އިޒްރޭލު ސިފައިން ގައްޒާއަށް ދިން ހަމަލާތަކާއި ގުޅިގެންވެސް ތުލުސްދޫގައި ފަލަސްތީނަށް ތާއީދުކޮށް ހަރުކޮށްފައިވާ ޕޯސްޓަރ ތަކަކަށް އިޒްރޭލު ފަތުރުވެރިން ގެއްލުން ދިނުމާއި ގުޅިގެން އިޒްރޭލު ފަތުރުވެރިންނާއި ތުލުސްދޫގެ އާއްމުންނާއި މެދު އުފެދުނު ދެކޮޅުވެރިކަމުގައި އެރަށުން އިޒްރޭލު ފަތުރުވެރިން ބޭލިއެވެ.