ފުޓުބޯޅަ އެސޯސިއޭޝަން އޮފް ދަ މޯލްޑިވްސް (އެފްއޭއެމް) އިން ފުޓުބޯޅަ ސީޒަނުގެ ކަލަންޑަރު ކުލަބުތަކާ ހިއްސާކޮށްފިއެވެ. އެގޮތުން، މިދިޔަ ޑިސެމްބަރު މަހު ނިމުނު ދިވެހި ޕްރިމިއަ ލީގު ޝެޑިއުލްގައި ވާގޮތުން ދެން ފަށާނީ 1 އޯގަސްޓް 2024 ގައެވެ.

އެފްއޭއެމްއިން ކުލަބުތަކަށް ފޮނުވި ކަލަންޑަރުގައި ވާގޮތުން، މި އަހަރުގެ ސީޒަން ފެށުމަށް ހަމަޖެހިފައިވަނީ ޖޫން މަހުގެ 15 ވަނަ ދުވަހުއެވެ. އެ މެޗުގައި ބައްދަލުކުރާނީ އެންމެ ފަހުގެ ލީގު ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން ކްލަބާއި، ކްލަބް އީގަލްސްއެވެ.

އެންމެ ފުރަތަމަ ސީޒަން ފެށުމަށް އެފްއޭއެމްއިން ބޭނުންވީ މެއި މަހުއެވެ. ނަމަވެސް ކުލަބުތަކާ މަޝްވަރާ ކުރުމަށްފަހު، ކުލަބުތަކުން ސީޒަނަށް ތައްޔާރުވުމަށް ވަގުތު ބޭނުންވާތީ، ސީޒަން ފެށުން ޖޫން މަހަށް ލަސްކުރީއެވެ.

ދިވެހި ޕްރިމިއަ ލީގު އޮގަސްޓުގައި ފަށާއިރު، މި އަހަރު ލީގުގައި 10 ޓީމެއް ކުޅޭނެކަމަށް އެފްއޭއިން ވަނީ ހާމަކޮށްފައެވެ. އޭގެ ތެރޭގައި ހިމެނެނީ މިދިޔަ ސީޒަނުގައި ކުޅުނު 8 ޓީމާއި، ދެވަނަ ޑިވިޝަނުގެ ފައިނަލުގައި ކުޅުނު ވިކްޓަރީ ސްޕޯޓްސް ކްލަބާއި މަސްއޮޑި ސްޕޯޓްސް ކްލަބެވެ.

ފުޓުބޯޅަ ސީޒަނުގެ މުހިންމު ތާރީހުތައް:

20 މެއި - 19 އަހަރުން ދަށުގެ ޔޫތު ޗެމްޕިއަންޝިޕް

15 ޖޫން - ސީޒަން ހުޅުވާ މެޗު

22 ޖޫން - ޕްރެޒިޑެންޓްސް ކަޕް

1 ޖުލައި - 17 އަހަރުން ދަށުގެ ޔޫތު ކަޕް

1 އޮގަސްޓު - ދިވެހި ޕްރިމިއާ ލީގު

12 އޮގަސްޓު - 14 އަހަރުން ދަށުގެ ޔޫތު ލީގު

7 އޮކްޓޯބަރ - ދެ ވަނަ ޑިވިޝަން ފުޓްބޯޅަ މުބާރާތް

28 އޮކްޓޯބަރ - އެފްއޭ ކަޕް

5 ޑިސެމްބަރ - ތިން ވަނަ ޑިވިޝަން ފުޓްބޯޅަ މުބާރާތް