ކުރިޔަށް އޮތް ދިރާސީ އަހަރުގެ ބޮޑު ޗުއްޓީގެ ދުވަސްތައް ރޯދަމަހާއި ދިމާވާގޮތަށް ދިރާސީ ކަލަންޑަރަށް އަނެއްކާވެސް ބަދަލު ގެނެސްފިއެވެ.

މިނިސްޓްރީން ފުރަތަމަ އާއްމު ކުރި، ޓެންޓެޓިވް އެކަޑަމިކް ކަލަންޑަރުގައި ވާގޮތުން، މިފެށޭ ދިރާސީ އަހަރުގެ ބޮޑުޗުއްޓީ ލިބޭނީ، ފެބުރުއަރީ މަހުގެ 23 އިން މާރިޗު 6 އަށެވެ. އެހެން ނަމަވެސް މިއަދު ސްކޫލުތަކަށް އެކަޑަމިކް ކަލަންޑަރު ފޮނުވި އިރު ވަނީ، މުޅި ރޯދަމަސް ޗުއްޓީގެ ތެރޭގައި ހިމެނޭ ގޮތަށް ދިރާސީ ކަލަންޑަރަށް ބަދަލު ގެނެސްފައެވެ.

2025 ވަނަ އަހަރުގެ ކަލަންޑަރުގައިވާ ގޮތުން، ރޯދަ މަހުގެ ފުރަތަމަ ދުވަހަކަށް ވާނީ، ފެބުރުއަރީ މަހުގެ 28 ވަނަ ދުވަހެވެ. އަދި ރޯދަ މަސް ނިމޭނީ، މާރިޗު މަހުގެ 27 ވަނަ ދުވަހުގައި ކަމަށް ވާއިރު ރޯދަމަހުގެ ފުރަތަމަ ހަފްތާ ނުހިމަނައި، އީދު ބަންދާއިއެކު ރޯދަމަސް ހިމަނާފައި ވަނީ ބޮޑު ޗުއްޓީގެ ތެރޭގައެވެ. މިގޮތުން 2024 ވަނަ އަހަރު ދިރާސީ އަހަރު ނިންމައި ސްކޫލުތައް ބަންދުކުރާނީ، މާރިޗު މަހުގެ 9 ވަނަ ދުވަހުގައެވެ. ސްކޫލުތަކުގެ ދެވަނަ ޓާމުގެ ޓެސްޓް ރޯދަމަހުގެ ކުރިން ނިންމާނެއެވެ.

Advertisement

އީދު ބަންދަށް ފަހު ސަރުކާރު ހުޅުވޭ ފުރަތަމަ ދުވަސް ކަމުގައިވާ 2025 ވަނަ އަހަރުގެ އޭޕްރީލް މަހުގެ ފުރަތަމަ ދުވަސް ހަމަޖައްސާފައި ވަނީ، ޓިޗަރސް ރިޕޯޓިން ޑޭ ގެ ގޮތުގައެވެ. 2025 ވަނަ އަހަރުގެ ދިރާސީ އަހަރު އޭޕްރީލް 6 ގައި ފަށާއިރު، ދިރާސީ އަހަރު ޑިސެމްބަރު މަށް ނިންމާނެއެވެ.

އަންނަ އަހަރުންފެށިގެންސް ސްކޫލުގެ ބޮޑު ޗުއްޓީ ޑިސެމްބަރު މަހަށް ބަދަލު ކުރާއިރު އެކަމަކީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ރިޔާސީ ވަޢުދެކެވެ.