ހުޅުމާލެ ސެންޓްރަލް ޕާކުގެ ތެރޭގައި މިރޭ 21:00 ހާއިރު ދިވެހި ޒުވާނުން ތަކަކާއި އިންޑިއާ ބަޔަކާއި ދެމެދު މާރާމާރީއެއް ހިނގައި އެކަކު ހައްޔަރުކޮށްފިއެވެ.

ފުލުހުންގެ އިދާރާއިން ވިދާޅުވީ، މިމާރާމާރީ އާއި ގުޅިގެން އަނިޔާވި ދެމީހަކަށް ހުޅުމާލެ ހޮސްޕިޓަލުގައި ފަރުވާދެމުންދާ ކަމަށެވެ. ފުލުހުންގެ އިދާރާއިން ވިދާޅުވީ، މާރާމާރީ އާއި ގުޅިގެން ހައްޔަރުކޮށްފައިވަނީ ދިވެހި ފިރިހެނެއް ކަމަށެވެ. އަދި މި މާރާމާރީގައި ޝާމިލްވާ މީހުންގެ ތެރޭގައި އުމުރުން 18 އަހަރު ނުފުރޭ ކުޑަކުއްޖަކު ނުހިމެނޭ ކަމަށްވެސް ފުލުހުންގެ އިދާރާއިން ވިދާޅުވިއެވެ.

ބައެއް ފަރާތްތަކުން މައުލޫމާތު ދީފައިވާ ގޮތުގައި ހަމަނުޖެހުން ހިންގި އިންޑިއާ މީހުން ތިބީ މަސްތުގެ ހާލަތުގައެވެ. އެހެން ނަމަވެސް އެކަމާއި ގުޅޭ ގޮތުން، ފުލުހުން އެއްޗެއް ވިދާޅެއް ނުވެއެވެ. ފުލުހުން ވިދާޅުވީ މައްސަލަ ތަހްޤީޤު ކުރަމުންދާ ކަމަށެވެ.

ހުޅުމާލެ މަގުތައް މަތީގައި މަސްތުގެ ހާލުގައި އުޅޭ އިންޑިއާ މީހުންގެ އަދަދު ފަހަކަށް އައިސް އިތުރުވަމުން އަންނަކަން ފާހަގަކުރެވިފައި ވެއެވެ.