އިންގްލިޝް ޕްރިމިއަ ލީގުގައި އާދީއްތަ ދުވަހު ޓޮޓެންހަމް ހޮޓްސްޕާއާ ދެކޮޅަށް ކުޅުނު މުހިންމު މެޗު ކާމިޔާބުކޮށް،  އާސެނަލްއާ ހަވާލުވިފަހުން އެ ޓީމުގެ ކޯޗު މައިކަލް އާޓޭޓާ 100 ވަނަ މޮޅު ހާސިލްކޮށްފިއެވެ. މިއީ އާޓޭޓާގެ ބެލުމުގެ ދަށުން އާސެނަލް ކުޅުނު 169 ވަނަ މެޗެވެ. އާސީން ވެންގާއަށް މި އަދަދަށް މެޗުން މޮޅު ވެވުނީ 179 މެޗުންނެވެ. އެއީ އާޓޭޓާއަށް ވުރެން އިތުރަށް 10 މެޗު ކުޅެގެންނެވެ.

ޓޮޓެންހަމްއާ ދެކޮޅަށް ކުޅުނު މި މެޗުގައި އާސެނަލްގެ ގޯލުތައް ފެނިގެން ދިޔައީ ފުރަތަމަ ހާފުގައެވެ. އެޓީމުގެ ފުރަތަމަ ގޯލަކީ ޓޮޓެންހަމްގެ ޑިފެންޑަރ، ހޮއިބިއާ އަތުން ބައިކޮޅަށް ވަތް ގޯލެކެވެ. އެ ޓީމުގެ ބާކީ ގޯލުތައް ކާމިޔާބުކުރީ ބުކާޔޯ ސަކާ އަދި ކައި ހަވަޓްސްއެވެ. ސަކާގެ މި ގޯލާއެކު އޭނާ މިވަނީ މިހާތަނަށް ލީގުގައި 15 ގޯލު ހަމަކޮށްފައެވެ. މިއީ މިހާތަނަށް އެއް ސީޒަނެއްގައި އޭނާއަށް މި އަދަދަށް ގޯލު ކާމިޔާބު ކުރެވުނު ފުރަތަމަ ފަހަރެވެ.

ޓޮޓެންހަމްގެ ގޯލުތައް ފެނިގެން ދިޔައީ ދެވަނަ ހާފުގައެވެ. އެ ޓީމުގެ ފުރަތަމަ ގޯލު ރޮމޭރޯ ކާމިޔާބުކުރިއިރު، ދެވަނަ ގޯލަކީ އެ ޓީމަށް ލިބުނު ކޯނަރަކުން ސޮން ހިއުންގް-މިން 87 ވަނަ މިނެޓުގައި ކާމިޔާބުކުރި ގޯލެކެވެ. މި ގޯލަށްފަހު މެޗުގެ ނަތީޖާ އަނބުރާލުމަށް ޓޮޓެންހަމް އިތުރަށް މަސައްކަތްކުރިއެވެ. ނަމަވެސް މިކަން ހާސިލްނުވެ، މެންޗެސްޓާ ސިޓީއަތުން ތަށި އަތުލުމަށް އާސެނަލް ކުރަމުންދާ މަސައްކަތަށް ލިބުނީ އިތުރު ހިއްވަރެކެވެ. ދެން އޮތީ އެ ޓީމަށް ލީގުގައި އޮތް އެންމެ މުހިންމު 270 މިނެޓުގެ ކުޅުމެވެ. މި 3 މެޗަކީ އެ ޓީމާއި ލީގު ތައްޓާއޮތް ދުރުމިންކަމުގައިވުން ވެސް އެކަށީގެންވެއެވެ.

އަނެއްކޮޅުން އެންމެ ފަހުގެ ޗެމްޕިއަން މެންޗެސްޓާ ސިޓީއިން ވަނީ ނޮޓިންހަމް ފޮރެސްޓްއާ ދެކޮޅަށް ކުޅުނު މެޗު 2-0 އިން ކާމިޔާބުކޮށް، އާސެނަލްއާ އެއް ޕޮއިންޓު ކައިރިޔަށް ޖެހިލާފައެވެ. އަދި ސިޓީއަށް އޮތް އެޑްވަންޓޭޖަކީ އާސެނަލްއަށް ވުރެން އެއް މެޗު މަދުން ކުޅެފައިވުމެވެ.

މި މެޗުގައި ސިޓީގެ ގޯލުތައް ކާމިޔާބުކޮށްދިފައިވަނީ ވާޑިއޯލްއާއި ހާލަންޑެވެ.