ގިނަ ދުވަސްތަކަކަށް ފަހު ވަޒީރުންގެ މަޖިލީހުގެ ބައްދަލުވުމެއް މިއަދު ބާއްވައިފިއެވެ.

ވަޒީރުންގެ މަޖިލީހުގެ ބައްދަލުވުންތައް، ނިމިދިޔަ ރައްޔިތުންގެ މަޖިލީހުގެ އިންތިޚާބުގެ ކެމްޕޭން ތެރޭގައި ބާއްވާފައެއް ނުވެއެވެ. އެހެން ނަމަވެސް ވަޒީރުންގެ މަޖިލީހުގެ ތެރެއިންް އެކުލަވާލާފައިވާ އެކި އެކި ކައުންސިލް ތަކުގެ ބައްދަލުވުންތައް އެދުވަސްވަރުވެސް ކުރިޔަށް ގެންގޮސްފައިވެއެވެ.

ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ވަޒީރުންގެ މަޖިލީހުގެ ބައްދަލުވުމުގައި ހުށައެޅި މަޝްވަރާކުރެވުނު ކަރުދާސްތަކާއި ގުޅޭ ގޮތުން އެއޮފީހުން އަދި މިހާތަނަށް އިތުރު މައުލޫމާތެއް ހާމައެއް ނުކުރެއެވެ. އެހެން ނަމަވެސް ރައްޔިތުންގެ މަޖިލީހުގެ އިންތިޚާބުގައި ސަރުކާރަށް ލިބުނު ބޮޑު ކާމިޔާބީ އާއެކު، ސަރުކާރުން ކުރަންޖެހޭ މަސައްކަތްތަކުގެ ދުވެލި ހަލުވި ކުރުމަށް ބޭނުންފުޅުވާކަން ރައީސުލްޖުމްހޫރިއްޔާ ވަނީ ހާމަކުރައްވާފައެވެ.

Advertisement

މިއަދުގެ ވަޒީރުންގެ މަޖިލީހުގެ ފޮޓޯތަކުން އެނގޭ ގޮތުގައި، އެބައްދަލުވުމުގައި ބައިވެރިވެވަޑައިގެންނެވީ 16 ވަޒީރުންނެވެ. މިސަރުކާރުގެ ވަޒީރުންގެ މަޖިލީހުގައި 22 ވަޒީރަކު ތިއްބަވާއިރު، މިއަދުގެ ވަޒީރުންގެ މަޖިލީހުގައި 6 ވަޒީރަކު ބައިވެރިވެވަޑައި ނުގަންނަވައެވެ. އޭގެ ތެރެއިން 4 ވަޒީރުން މިވަގުތު ތިއްބެވީ ރަސްމީ ދަތުރުފުޅެއްގައި ރާއްޖެއިން ބޭރުގައި ކަމަށް މައުލޫމާތު ލިބިފައިވެއެވެ.

ވަޒީރުންގެ މަޖިލީހުގެ ބައްދަލުވުމެއް އެންމެ ފަހުން ބާއްވަވާފައި ވަނީ 10 މާރިޗު 2024 ގައެވެ.