ނައްތާލަން ބޭނުންވާ ބާ މުޞްޙަފުތަކާއި ޤުރުއާނުގެ އާޔަތް ނުވަތަ ޙަދީޘް ހިމެނޭ އެފަދަ ދީނީ ފޮތްތަކާއި ލިޔުންތައް މާލޭ ސިޓީ ކައުންސިލަށް މިއަދުން ފެށިގެން ބަލައިގަންނަން ފަށައިފިއެވެ.

އެކައުންސިލުން ވިދާޅުވީ، މާލޭ ސަރަޙައްދުގެ ގޭގޭގައި ހުރި ނައްތާލަން ބޭނުންވާ ބާ މުޞްޙަފުތަކާއި ޤުރުއާނުގެ އާޔަތް ނުވަތަ ޙަދީޘް ހިމެނޭ އެފަދަ ދީނީ ފޮތްތަކާއި ލިޔުންތައް، މިއަދުން ފެށިގެން މެއި މަހުގެ 2 ވަނަ ދުވަހުގެ ނިޔަލަށް ބަލައިގަންނަމުންދާނެ ކަމަށެވެ. 

މިގޮތުން މިތަކެތި ބަލައިގަންނަމުންދާނީ،  27 އޭޕްރީލް 2024 ން 2 މެއި 2024 ގެ ނިޔަލަށް ކޮންމެ ދުވަހެއްގެ ހެނދުނު 9:00 ން ހަވީރު 4:00 އަށް މި އިދާރާގެ ޢާއްމު ޚިދުމަތްތަކާބެހޭ ބައި (ތައިސޭކޮށި) ވިލިމާލެ ސެކްޝަން އަދި ހުޅުމާލެ ސެކްޝަނުންނެވެ.

މިއީ މާލޭ ސިޓީ ކައުންސިލުން އަހަރަކު ދެފަހަރު ކުރިޔަށް ގެންދިޔުމަށް ހަމަޖައްސާފައިވާ ކަަމެކެވެ. މިގޮތުން، ނައްތާލަން ބޭނުންވާ ބާ މުޞްޙަފުތަކާއި ޤުރުއާނުގެ އާޔަތް ނުވަތަ ޙަދީޘް ހިމެނޭ އެފަދަ ދީނީ ފޮތްތަކާއި ލިޔުންތައް ނެގުމަށް އިއުލާނުކުރި މިއީ މިއަހަރުގެ ފުރަތަމަ ފަހަރެވެ.

ގިނަ ދުވަސްވީ ބައު މުސްހަފުތަކާއި ފޮތްތައް އަދި ޤުރުއާން ލިޔެފައި ހުންނަ ތަކެތި އާއްމު ކުންޏާއި އެކު އުކާލުމަކީ ކޮށްގެންވާނޭ ކަމެއް ނޫންކަމުގައި ދީނީ ޢިލްމުވެރިން މީގެ ކުރިންވެސް ވިދާޅުވެފައިވެއެވެ.

ރައީސް ޔާމީނުގެ ސަރުކާރުގައި ޗާޕްކުރި ކީރިތި ޤުރުއާނުގެ ތަރުޖަމާތަކެއް 2017 ވަނަ އަހަރުގެ އޮގަސްޓް މަަހުގެ ތެރޭގައި ބަޔަކު ތިލަފުށީ ގޮނޑަށް އުކާލުމާއި ގުޅިގެން ވަރަށް ބޮޑަށް މައްސަލަ ގޯސްވިއެވެ.