އިންގްލިޝް ޕްރިމިއަ ލީގުގައި ބުރާސްފަތި ދުވަހުގެރޭ ބްރައިޓަން އެންޑް ހޯވް އަލްބިއަން (ބްރައިޓަން) 4-0 އިން ބަލިކޮށް، މެންޗެސްޓަރ ސިޓީއިން ލީގުގެ އެއްވަނައިގައި އޮތް އާސެނަލްއާ އެއް ޕޮއިންޓަށް ކައިރިއަށް ޖެހިލައިފިއެވެ.

އާސެނަލް އިން ހަފްތާގެ މެދުތެރޭގައި ޗެލްސީ ބޮޑު ތަފާތަކުން ބަލިކޮށް، ސިޓީ އާއި އޮތް ފަރަގު 4 ޕޮއިންޓަށް އިތުރުކުރި ނަމަވެސް، އެވަޓަން އަތުން ބަލިވެ ލީގު ކާމިޔާބު ކުރުމަށް ލިވަޕޫލުން ކުރަމުންދާ މަސައްކަތަށް ވަނީ ހިޔަނި އެޅިފައެވެ. އެއާ ވިދިގެން ސިޓީއިން ބްރައިޓަން ކޮޅަށް މި ހޯދި މޮޅާއެކީ، ލީގުގެ ކޮންޓްރޯލް ސިޓީގެ އަތްމައްޗަށް މިހާރު މިވަނީ ގާތްގަނޑަކަށް ގެނަސްފައެވެ.

ބްރައިޓަންއާ ދެކޮޅަށް ކުޅުނު މެޗުގައި ސިޓީއިން ވަނީ ފުރަތަމަ ހާފުގައި 3 ގޯލުގެ ލީޑެއް ނަގާފައެވެ. ސިޓީގެ ފުރަތަމަ ގޯލަކީ ޑި ބްރޫނޭގެ "ޑައިވިންގް ހެޑަރ" އަކުން ކާމިޔާބުކުރި ރީތި ގޯލެކެވެ. މިއީ ލީގުގައި މިހާތަނަށް 255 މެޗުން 68 ގޯލު ޑި ބްރޫނޭ ކާމިޔާބު ކޮށްފައިވާއިރު، އޭނާ ބޮލުން ކާމިޔާބުކުރި ފުރަތަމަ ގޯލެވެ.

Advertisement

ފުރަތަމަ ހާފުގެ ގޯލުތައް ދެން ކާމިޔާބު ކޮށްދިނީ ފިލް ޕޮޑެންއެވެ. މި ގޯލުތަކާއެކު ފޮޑެން މިވަނީ ޕްރިމިއަ ލީގުގައި 50 ހަމަކޮށްފައެވެ. މި ކާމިޔާބާއެކީ، ގާޑިއޯލާގެ ކޯޗު ކަމުގެ ދަށުން މި ލެވެލްގައި އުމުރުން 23 އަހަރު ނުވަތަ އެއަށްވުރެން ހަގުކޮށް މި އަދަދަށް ގޯލު ހަމަކުރި 3 ކުޅުންތެރިންގެ ތެރޭގައި ފޮޑެން މިވަނީ ހިމެނިފައެވެ. ދެން މި ލިސްޓުގައި ހިމެނެނީ، ލިއޮނެލް މެސީ އަދި އާލިން ހާލަންޑެވެ.

ސިޓީގެ ފަހުގޯލު ކާމިޔާބުކުރީ، ކައިލް ވޯކާ ތަނަވަސް ކޮށްދިން ރީތި ފުރުސަތަކުން ޖޫލިއަން އަލްވަރޭޒްއެވެ.

މި މޮޅާއެކު ސިޓީ މިވަނީ މި ސީޒަނުގައި މެޗަކުން ބަލިނުވެ 30 މެޗު ހަމަކޮށްފައެވެ.