ދިވެހިރާއްޖޭގެ ޤައުމީ ޔުނިވަރސިޓީގެ ސްކޫލް އޮފް މެޑިސިންގެ ދަރިވަރުންނާއި މެދު ކަންތައް ކުރާ ގޮތާއި މެދު މާލޭ ސިޓީގެ މޭޔަރު އާދަމް އާޒިމް ކަންބޮޑުވުން ފާޅުކުރައްވައިފިއެވެ.

ދިހަ އަހަރުގެ އެއްބަސްވުމެއްގެ ދަށުން، ސްކޫލް އޮފް މެޑިސިން ހިންގަމުން އައި ދަރުމަވަންތަ ހޮސްޕިޓަލުގެ އިމާރާތުން ކުދިން ނެރެލައި، ސްކޫލް އޮފް މެޑިސިން ޤައުމީ ޔުނިވަސިޓީގެ ސެންޓްރަލް އެޑްމިނިސްޓްރޭޝަން ބިލްޑިންގއަށް ބަދަލުކުރުމަށް މިހާރު ވަނީ ނިންމާފައެވެ. އެނިންމުމާއި ގުޅިގެން ދަރިވަރުންގެ ޔޫނިއަންއިންވެސް ވަނީ ކަންބޮޑުވުން ފާޅުކޮށްފައެވެ.

މިމައްސަލައިގެ ކަންބޮޑުވުން ފާޅުކުރައްވައި މާލޭ ސިޓީގެ މޭޔަރު އާދަމް އާޒިމް އެކްސްގައި ކުރެއްވި ޕޯސްޓެއްގައި ވިދާޅުވީ، އެއީ އެތައް ހާސް ދަރިވަރުންނަށް އަސަރު ކުރާނެ ކަމެއް ކަމަށާއި، އެކުދިން އިމާރާތުން ނެރުމަކީ މެޑިސިން ފަދަ ކޯހެއްގައި ކިޔަވާ ދަރިވަރުންތަކެއް ކިޔެވުމަށް ކުރަންޖެހޭނެ މަސައްކަތާމެދު ވިސްނާނުލާ ދެވޭ ނިކަމެތި ކަމެއް ކަމަށެވެ. މީގެ އިތުރުން އެކުދިންގެ ކިޔެވުމަށް ކުރާ މަސައްކަތަކީ ވަރަށް ބުރަކޮށް ކުރާ ހޭދައެއްކަމާއި އަދި ބެލެނިވެރިންގެވެސް ވަރަށްބޮޑު އުންމީދެއްކަން އާޒިމް ފާހަގަކުރެއްވިއެވެ.

Advertisement

އާޒިމް ވިދާޅުވީ، ދަރިވަރުންނާމެދު ޢަމަލުކުރަންވާނީ މިއަށްވުރެ އިންސާނިއްޔަތުކަން އިސްކޮށްކަމުގައި ދެކެވަޑައިގަންނަވާ ކަމަށާއި، ދާއިމީ ހައްލެއް ލިބެންދެއް ދަރިވަރުންނަށް ދަރުމަވަންތަ ހޮސްޕިޓަލްގައި ތިބެވެންޖެހޭނެ ކަމަށް އެމަނިކުފާނުވެސް ދެކެވަޑައިގަންނަވާ ކަމަށެވެ.

މިނިންމުމާއި މެދު ދަރިވަރުންނާއި ދަރިވަރުންގެ ޔޫނިއަންއިން ކަންބޮޑުވުން ފާޅުކުރި ނަމަވެސް އެކަން ދިފާޢުކޮށް ދިވެހިރާއްޖޭގެ ޤައުމީ ޔުނިވަރސިޓީން ވަނީ ނޫސް ބަޔާނެއް ނެރެފައެވެ.