މިއަހަރުގެ އަޟުހާ އީދު ކުލަގަދަކޮށް ފާހަގަކުރަން ބޭނުންވާ ރަށްރަށުން ޕްރޮޕޯސަލްތައް ހުށައެޅުމަށް، ދިވެހިބަހާއި ސަގާފަތާއި ތަރިކައާ ބެހޭ ވުޒާރާއިން ހުޅުވާލައިފިއެވެ.

އެވުޒާރާއިން ކޮށްފައިވާ އިއުލާނުގައި ބުނީ، އެވުޒާރާ އާއި ގުޅިގެން މި އަހަރުގެ އަޟްހާ އީދު ފާހަގަ ކުރަން ޝައުގުވެރިވާ ރަށްރަށުން އެކަމަށް އެދި ޕްރޮޕޯސަލްތައް ހުށައެޅުމުގެ ފުރުޞަތު މިއަހަރުގެ  މެއި މަހުގެ 9، ވާ ބުރާސްފަތި ދުވަހުގެ 13:00 އާއި ހަމައަށް ހުޅުވާލާފައި ވާކަމަށެވެ.

މިގޮތުން، ހުށަހަޅުއްވާ ޕްރޮޕޯޒަލްތަކުގެ ތެރެއިން އަޟްޙާ ޢީދު ފާހަގަކުރާނެ ރަށެއް ކަނޑައެޅުމުގައި ބަލާނީ އަޟްޙާ ޢީދުގައި އެރަށަކުން ކުޅޭނެ ކުޅިވަރުތަކަށާއި، ކައުންސިލުން ކުރައްވާނެ ޚަރަދުތަކާއި، އަދި އަގެއް ނުނަންގަވާ އެރަށަކުން ކޮށްދެއްވާނެ ކަންތައްތަކުގެ މައްޗަށް ބަލައިގެން ކަމުގައި އެވުޒާރާއިން ހާމަކޮށްފައިވެއެވެ.

Advertisement

އެވުޒާރާއިން ވިދާޅުވީ، އެވުޒާރާއިން މިއަހަރު އަޟްޙާ ޢީދު ފާހަގަ ކުރުމަށް ހަމަޖެހިފައި ވަނީ ރާއްޖޭގެ ތިން ރަށެއްގައި ކަމަށާއި، މިގޮތުން އެރަށްތައް ކަނޑައެޅުމަށް ހަމަޖެހިފައިވަނީ ހުށަހަޅާ ޕްރޮޕޯސަލްތައް މި ވުޒާރާގެ ފަރާތުން ބެލުމަށްފަހު އެންމެ ރަނގަޅު ތިން ޕްރޮޕޯސަލެއް ހުށަހަޅުއްވާ ތިން ރަށެއްގައި އީދު ފާހަގަކުރާ ގޮތަށް ކަމަށެވެ. 

ސަރުކާރުން ވަނީ މިއަހަރުގެ ފިޠުރު ޢީދުވެސް މާލެ ސަރަހައްދާއި ބައެއް ރަށްރަށުގައިކުލަ ގަދަކޮށް ފާހަގަކޮށްފައެވެ.