ނެޝަނަލް ސްޓޫޑެންޓް ލޯން ސްކީމްގެ ދަށުން ރާއްޖެއާއި ރާއްޖެއިން ބޭރުން ތަޢުލީމް ހާސިލްކުރަން ބޭނުންވާ ފަރާތްތަކަށް، އިތުރު 7 ދުވަހުގެ މުހުލަތެއް ދީފިއެވެ.

ހަޔަރ އެޑިޔުކޭޝަން މިނިސްޓްރީން ބުނީ، ސްޓޫޑެންޓް ލޯނަށް އެދި ހުށައެޅުމަށް މިހާރު ދީފައިވާ މުއްދަތު، މެއި 2 ވާ ބުރާސްފަތު ދުވަހުގެ މެންދުރުފަހު 1:30އަށް މިހާރު އިތުރުކޮށްދީފައި ވާކަމަށެވެ. މިގޮތުން ލޯނަށް އެދި ހުށައަޅަންޖެހޭނީ އެކަމަށްޓަކައި ޤާއިމްކޮށްފައިވާ ޕޯޓަލް މެދުވެރިކޮށް ކަމުގައިވެސް ހަޔަރ އެޑިޔުކޭޝަނުން ވަނީ ބުނެފައެވެ. އަދި ކޮންމެ ދަރިވަރަކަށްވެސް ހުށައެޅޭނީ އެއް އެޕްލިކޭޝަން ފޯމު ކަމުގައިވެސް ހަޔަރ އެޑިޔުކޭޝަނުން ވަނީ ވިދާޅުވެފައެވެ.

ރާއްޖެއާއި ރާއްޖެއިން ބޭރުން މަތީ ތަޢުލީމާއި ތަމްރީނު ހޯދަން ދޭ ލޯނަށް އެދި އެޕްލިކޭޝަން ހުށަހެޅުމުގެ ފުރުސަތު ހުޅުވާލީ މިއަހަރުގެ ފެބުރުއަރީ މަހުގެ 29 ވަނަ ދުވަހުގައެވެ. މިގޮތުން އެދުވަހު ވަނީ 500 ލޯނު ފުރުޞަތު ހުޅުވާލާފައެވެ.

Advertisement

މި ސްކީމުގެ ދަށުން ލޯނު ދިނުމަށް ހަމަޖެހިފައިވަނީ 2 ކެޓަގަރީއަކުން ކަމަށާއި، އޭގެ ތެރޭގައި ހިމެނޭނީ އަލަށް ކިޔަވަން ފަށާ ދަރިވަރުންނާއި، މިހާރުވެސް ކިޔަވަމުންދާ ދަރިވަރުން ކަމުގައި މިނިސްޓްރީން ވިދާޅުވިއެވެ. އެމިނިސްޓްރީން ވިދާޅުވީ، މި ލޯނު ސްކީމުގެ ދަށުން ދޫކުރާ ޓޮޕްއަޕް ލޯނު ދިނުމަށް ހަމަޖެހިފައިވަނީ 7 ލައްކަ ރުފިޔާ އަށް ވުރެ ބޮޑުނުވާ އަދަދަކަށް ކަމަށެވެ.

މިލޯނު ފުރުޞަތުގެ ދަށުން، އަލަށް ކިޔަވަން ފަށާ، 370 ދަރިވަރުންނަށާއި، އަދި މިހާރު ކިޔަވަމުންދާ ދަރިވަރުންނަށް 130 ދަރިވަރަކަށް ފުރުޞަތު ދޭނެ ކަމުގައި ވެސް އެމިނިސްޓްރީން ވިދާޅުވެއެވެ. މިގޮތުން ރާއްޖޭގައި ޕައިލެޓް ލައިސަންސް ކޯސް ހެދުމަށް 10 ދަރިވަރަކަށް އަދި ރާއްޖެއިންބޭރުގައި ޑޮކްޓަރުންކަން ކިޔެވުމަށް 10 ދަރިވަރަކަށް ލޯނު ދޭނެއެެވެ.