ޗައިނާ ސަރުކާރުން ބޭނުންވަނީ އެ ގައުމުގެ ރައްޔިތުން އައިފޯނު ބޭނުން ކުރުން ހުއްޓާލުމަށްކަމަށް، ޓެލެގްރާމްގެ ފައުންޑަރ އަދި ސީއީއޯ، ޕަވެލް ޑުރޯވް ބުނެފިއެވެ. ޑުރޯވް މިހެން ބުނީ، އެޕަލް ކުންފުނީގެ އެޕް ސްޓޯރުން ގިނަ އެޕްލިކޭޝަންތަކެއް ޗައިނާއިން ޑައުންލޯޑު ނުކުރެވޭ ގޮތް ހެދުމަށް ޗައިނާ ސަރުކާރުން އެޕަލް ކުންފުންޏަށް އެންގުމާ ގުޅިގެންނެވެ.

އެޕް ސްޓޯރުން ނެގުމަށް ޗައިނާ ސަރުކާރުން އެންގި އެޕްލިކޭޝަންތަކުގެ ތެރޭގައި ޑުރޯވްގެ ޓެލެގްރާމް ވެސް ހިމެނެއެވެ. ނަމަވެސް، ޑުރޯވް އޭނާގެ ޓެލެގްރާމް ޗެނަލްގައި ހާމަކޮށްފައިވާ ގޮތުގައި، ޗައިނާގެ މި ފިޔަވަޅާ ގުޅިގެން ޗައިނާއިން ޓެލެގްރާމް ޑައުންލޯޑުކުރާ މިންވަރަށް ބަދަލެއް ނާދެއެވެ.

މީގެ އިތުރުން، ޗައިނާގައި ޓެލެގްރާމް ބޭނުން ކުރުމަށް "ވީޕީއެން" އެއް ބޭނުންވި ނަމަވެސް، ގޫގުލް ޕްލޭގެ ތަފާސް ހިސާބުތައް ދައްކާ ގޮތުން، ޗައިނާގައި އެންރޮއިޑް ބޭނުންކުރާ މީހުން ވެސް އެންމެ ގިނައިން ޑައުންލޯޑުކުރާ އެޕްލިކޭޝަނަކީ ޓެލެގްރާމްއެވެ.

ޑުރޯވް ދެކޭގޮތުގައި، ޗައިނާގެ މި ނިންމުމަކީ ޓެލެގްރާމާ ދެކޮޅަށް ނިންމި ނިންމުމެއް ނޫނެވެ. ނަމަވެސް މިއީ ސީދާ އެޕަލް ކުންފުންޏާ ދެކޮޅަށް ނިންމި ނިންމުމެކެވެ. އޭނާ ބުނާ ގޮތުން، ޗައިނާގެ ސަރުކާރުން ބޭނުންވަނީ އެ ގައުމުގެ ރައްޔިތުން އެޕަލް އާލާތްތައް ބޭނުން ކުރުމުގެ ބަދަލުގައި، ޒިއޯމީ ފަދަ އެ ގައުމުގެ ސްމާޓް އާލާތްތަކަށް ބަދަލު ކުރުމެވެ. އަދި ޗައިނާގެ މި ނިންމުމާ ގުޅިގެން އެގައުމުގައި އެޕަލްގެ އާލާތްތައް ބޭނުންކުރާ މިންވަރު ދަށަށް ދާނެކަމަށް ބެލެވެއެވެ.

ޗައިނާ ސަރުކާރުގެ މި ނިންމުމާ ދެބަސްވެ ޑުރޯވް ބުނީ، މިނިވަންކަމަށް ވުރެން ފައިދާ އިސްކުރުމަކީ ދިގު ރާސްތާގައި ރަގަޅު ގޮތަކަށް ނުވާނެ ކަމަށެވެ.