މިއަހަރުގެ މާރިޗު މަހުގައި، ފަޤީރުންނާއި މިސްކީނުންނަށް ބޭސް ފަރުވާގެ އެހީގެ ގޮތުގައި ޖުމުލަ 8 ލައްކަ ރުފިޔާގެ އެހީ ދެވިފައިވާ ކަމުގައި، މޯލްޑިވްސް ޒަކާތު ހައުސްއިން ހާމަކުރައްވައިފިއެވެ.

އެ އިދާރާއިން މިކަން ހާމަކުރައްވާފައިވަނީ، އެ އިދާރާގެ ޚަރަދު ބަރަދާއި ގުޅޭ ގޮތުން އާއްމު ކުރި ރިޕޯޓުގައެވެ. އެެިޕޯޓުގައި ވާގޮތުން ފަޤީރުންނާއި މިސްކީނުންގެ ތެރެއިން ބޭސްފަރުވާގެ އެހީ ބޭނުންވާ 59 މީހަކަށް، 878،682.88ރ ވަނީ އެހީގެ ގޮތުގައި ދޫކޮށްފައެ އެވެ. އޭގެ ތެރެއިން އެންމެ ގިނަ ފައިސާ އެހީގެ ފައިސާ ދޫކޮށްފައި ވަނީ ކެންސަރުގެ ބަލިތަކަށް ފަރުވާކުރަމުން އަންނަ މީހުންނަށެވެ. މިގޮތުން ކެންސަރުގެ ބަލިތަކަށް ފަރުވާ ކުރަމުން އަންނަ މީހުންނަށް، 190،822.50ރ ހޭދަކޮށްފައި ވާއިރު، ފުރަމޭގެ ބަލިތަކަށް، 25،443ރ އަދި ހިތުގެ އޮޕަރޭޝަންތަަކަށް 8،481ރ ވަނީ އެހީގެ ގޮތުގައި ދީފައެވެ.

މީގެ އިތުރުން ޚާއްޞަ ހާލަތްތައް މެދުވެރިވެގެން ހާލުގައި ޖެހޭ ފަރާތްތަކަށް ދޭ އެހީގެ ގޮތުގައި، 17،207.65ރ އެހީގެ ގޮތުގައި ދޫކޮށްފައިވާއިރު، ރާއްޖެއިން ބޭރުގައި ވަނިކޮށް ހާލުގައި ޖެހުނު ފަރާތްތަަކަށް، 248،604ރ އެހީގެ ގޮތުގައި ދީފައިވެއެވެ.

މީގެ އިތުރުން ޒަކާތު ފަންޑުން ދީފައިވާ ސްކޮލަރޝިޕްތަކުގައި ކިޔަވާ ދަރިވަރުންނަށް، 44،533،80ރ ޚަރަދުކޮށްފައި ވާއިރު، މޯލްޑިވްސް ޒަކާތު ހައުސްގެ އިދާރީ މުވައްޒަފުންނަށް އުޖޫރައިގެ ގޮތުގައިމާރިޗު މަހު، 374،950.28ރ ޚަރަދުކުރެވިފައިވާ ކަމުގައިވެސް އެއިދާރާއިން ވަނީ ހާމަކޮށްފައެވެ.