އާސެނަލްގެ އެމިރޭޓްސް ސްޓޭޑިއަމްގައި 5-0 އިން ޗެލްސީ ބަލިކޮށް، އެ ޓީމުން ޕްރިމިއަ ލީގު ކާމިޔާބުކުރުމަށް ކުރާ އުއްމީދު އައުކޮށްފިއެވެ.

މިއީ 1986 ވަނަ އަހަރަށްފަހު ލަންޑަންގެ ޓީމަކާ ދެކޮޅަށް ކުޅެ، މިހާ ބޮޑު ތަފާތަކުން ޗެލްސީ ބަލިވި ފުރަތަމަ ފަހަރެވެ. އަނެއްކޮޅުން މިއީ ޗެލްސީއާ ދެކޮޅަށް އާސެނަލް ހޯދި އެންމެ ބޮޑު ކާމިޔާބީއެވެ.

މި މެޗުގައި އާސެނަލްއިން ވަނީ މެޗުގެ 4 ވަނަ މިނެޓުގައި ލީޑު ނަގާފައެވެ. މި ގޯލު އެ ޓީމަށް ކާމިޔާބުކޮށްދިނީ ފޯވާޑް ލެއާންޑްރޯ ޓްރޮސާޑްއެވެ. އާސެނަލްގެ ބާކީ ގޯލުތައް ފެނިގެން ދިޔައީ ފަހު ހާފުގެ، 18 މިނެޓުގެ ތެރޭގައެވެ.

ޗެލްސީއަށް 91 މެޗު ކުޅެދިނުމަށްފަހު އާސެނަލްއަށް ބަދަލުވި، ކައި ހަވަޓްސްވަނީ ޗެލްސީކޮޅަށް 2 ގޯލު ޖަހާފައެވެ. މިއީ، ޗެލްސީއިން ބަދަލުވި ކުޅުންތެރިއަކު، އެއް މެޗެއްގައި އެ ޓީމުގެ ކޮޅަށް 2 ގޯލު ޖެހި ފުރަތަމަ ފަހަރުކަން ވެސް ފާހަގަކޮށްލަމެވެ.

އާސެނަލްގެ އަނެއް ދެ ގޯލު ކާމިޔާބުކޮށްދިނީ، އެ ޓީމުގެ ކަނާތް ފަރާތުން ފަހަތަށް ކުޅޭ ބެން ވައިޓްއެވެ.

މި މެޗުގައި އާސެނަލްގެ ކެޕްޓަން މާޓިން އޮޑެގާޑު ވަނީ ނަތީޖާ ބަދަލު ކުރުމުގައި މުހިންމު ދައުރެއް އަދާކޮށްފައެވެ. އޭނާ މި މެޗުގައި ގޯލު ޖެހުމަށް 8 ފުރުސަތު ތަނަވަސްކޮށްދިން އިރު، މީގެ ތެރެއިން 2 ފުރުސަތަކުން ވަނީ ގޯލު ކާމިޔާބު ކޮށްފައެވެ.

ޗެލްސީއާ ދެކޮޅަށް ހޯދި 3 ޕޮއިންޓާއެކު ޖުމްލަ 77 ޕޮއިންޓު ހަމަކޮށް، އާސެނަލް މިވަނީ ތާވަލުގެ އެއްވަނައިގައި 3 ޕޮއިންޓުގެ ލީޑެއްވެސް ނަގާފައެވެ. ލީގުގެ ދެވަނައިގައި އޮތީ އެއް މެޗު މަދުން ކުޅެ 74 ޕޮއިންޓާއެކު ލިވަޕޫލްއެވެ. އަދި އާސެނަލްއަށް ވުރެން ދެ މެޗު މަދުން ކުޅެފައިވާ މެންޗެސްޓަރ ސިޓީ އޮތީ 73 ޕޮއިންޓާއެކު ލީގުގެ ތިންވަނައިގައެވެ.