އޭސީ މިލާނާ ދެކޮޅަށް ކުޅުނު ހޫނުގަދަ ލީގު މެޗަށްފަހު، އިޓާލިއަން ސީރިއާގެ ތަށި ވިހި ވަނަ ފަހަރަށް އިންޓަ މިލާންއިން ޔަގީންކޮށްފިއެވެ. 

މި މެޗުގައި އިންޓަ މިލާންއަށް ގޯލުތައް ކާމިޔާބުކޮށްދިނީ އެ ޓީމުގެ އެންމެ ފަހަތަށް ކުޅޭ ފްރާންސެސްކޯ އަޗެރްބީ އާއި ޓީމުގެ ފޯވާޑް، މާކަސް ތުރާމް އެވެ. އޭސީ މިލާންގެ ހަމައެކަނި ގޯލު ކާމިޔާބުކޮށްދިނީ އެ ޓީމުގެ އެންމެ ފަހަތަށް ކުޅޭ ކުޅުންތެރިޔާ ފިކާޔޯ ޓޮމޯރީއެވެ.

މި މެޗުގެ އިތުރު ވަގުތުގައި، ދެ ޓީމުގެ ކުޅުންތެރިންގެ މެދުގައި ހިނގާދިޔަ ހަމަނުޖެހުންތަކަކާ ގުޅިގެން ތިން ރަތް ކާޑު ފެނިގެން ދިޔައެވެ. އެގޮތުން އޭސީ މިލާނުން މެޗު ނިންމާލަން ޖެހުނީ އެ ޓީމުގެ ތެއޯ ހެނާންޑޭޒް އަދި ޑޭވިޑް ކަލާބްރިއާ އަށް ރަތް ކާޑު ދައްކާ ދަނޑަށް ފޮނުވާލުމުން، ނުވަ ކުޅުންތެރިންނާ އެކުގައެވެ. މި ކުޅުންތެރިންނާ އެކު އިންޓާގެ ޑެންޒެލް ޑަމްފްރީޒްއަށް ވެސް ވަނީ ރަތް ކާޑު ދައްކާފައެވެ.

މި ސީޒަނުގައި އެންމެ މެޗަކުން ބަލިވެފައިވާ އިންޓަ މިލާނަށް، މި މޮޅާއެކު ވަނީ ލީގުގެ ދެވަނައިގައި އޮތް އޭސީ މިލާނަށް ވުރެން އިތުރަށް 17 ޕޮއިންޓު ލިބިފައެވެ. ނަމަވެސް، މި ތަށި ޔަގީންކުރިއިރު، އެ ޓީމަށް ލީގުގައި އަދި 5 މެޗު ބާކީ އެބައޮތެވެ.