އާދީއްތަ ދުވަހު ބޭއްވި ރައްޔިތުންގެ މަޖިލީހުގެ އިންތިޚާބުގައި ސަރުކާރު ހިންގާ ޕާޓީ ޕީއެންސީއަށް ލިބުނު އާދަޔާއި ޚިލާފު ބޮޑު ކާމިޔާބީއަށް ފަހު، ރައީސުލްޖުމްހޫރިއްޔާ ޑރ. މުހައްމަދު މުޢިއްޒު އަނެއްކާވެސް ނުސީދާ ބަހުގެ ހަމަލާއެއް އިންޑިއާއަށް ދެއްވައިފިއެވެ.

ސަރުކާރަށް މަޖިލިސް އިންތިޚާބުގައި ލިބުނު ބޮޑު ކާމިޔާބީ ފާަހަގަ ކުރުމަށް ހޯމަ ދުވަހުގެ ރޭ އާޓިފިޝަލް ބީޗުގައި ބޭއްވި ޖަލްސާގައި ވާހަކަފުޅު ދައްކަވަމުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ދިވެހިން ތިބިގޮތް ބައިނަލް އަޤުވާމީ މުޖުތަމައަށާއި ޤައުމުތަކަށް މިހާރު ސާފު ވާނެ ކަމަށެވެ. އެގޮތަކީ، ދިވެހިންގެ ކަންކަން ދިވެހިން ނިންމުން ކަމުގައި ރައީސް ޑރ. މުޙައްމަދު މުއިއްޒު ވިދާޅުވިއެވެ.

ރިޔާސީ އިންތިޚާބުގެ ކުރިންނާއި އޭގެ ފަހުންވެސް ރައީސް ޑރ. މުއިއްޒު ވަނީ ރާއްޖޭގެ ދާޚިލީ ކަންކަމާއި އިންޑިއާއިން ބެހޭ ކަމުގައި ތުހުމަތު ކުރައްވާފައެވެ. އަދި އެމަނިކުފާނުގެ ރިޔާސީ ކެމްޕޭނުގެ މައިގަނޑު އެއް ވައުދަކީ ރާއްޖޭގައި ތިބި އިންޑިއާ ސިފައިން ރާއްޖެއިން ފޮނުވާލުން ކަމަށް ވާއިރު، މިހާރު ވަނީ ޔުނީފޯމްއެޅި އިންޑިއާ ސިފައިން ފޮނުވާލައި، އިންޑިއާގެ އާއްމުން ކުރިން އިންޑިއާ ސިފައިން ތިބި މަޤާމުތަކުގައި ބައިތިއްބާފައެވެ.

ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ވިދާޅުވީ، ރާއްޖޭގެ ރައްޔިތުންގެ ވިސްނުން ޤަބޫލު ނުކުރާ ފަރާތްތަކަށްވެސް ރާއްޖޭގެ ރައްޔިތުން ތިބި ގޮތް ސާފުވާނޭ ކަމަށެވެ.

ރައީސް ޔާމީނު އިސްވެ ހުންނަވައި ފެއްޓެވި އިންޑިއާ އައުޓް ކެމްޕޭނަކީ، ޒަމާނުއްސުރެ ދިވެހިރާއްޖެ އާއި އިންޑިއާ އާއި ދެމެދު އޮތް ގުޅުންތަކަށް ކިލަނބުކަން ގެނުވި ކަމެކެވެ. އަދި އިންޑިއާ އާއި ގުޅުވައި، ސިޔާސީ ފަރާތްތަކުން ފަތުރާ ވާހަކަތައް އާއްމުން ޤަބޫލުކުރާކަން ރިޔާސީ އިންތިޚާބާއި މަޖިލިސް އިންތިޚާބުގައިވެސް މިވަނީ ފެނިގެން ގޮސްފައި ކަމުގައި ސިޔާސީ ދާއިރާގެ ބައެއް ބޭފުޅުން ފާހަގަކުރައްވާފައިވެއެވެ.