އިއްޔެ ބޭއްވި ރައްޔިތުންގެ މަޖިލީހުގެ އިންތިޚާބުގައި، ސަރުކާރު ހިންގާ ޕާޓީ ޕީއެންސީއަށް ލިބުނު ބޮޑު ކާމިޔާބީ ހަވާ އެރުވުމާއި އެކު މިރޭ ކުލަގަދަކޮށް ފާހަގަކުރުމަށް އެޕާޓީން ނިންމައިފިއެވެ.

ޕީއެންސީން ބުނީ، "ދިވެހީންގެ ރާއްޖެ މަޖިލީހަށް - މަރުހަބާ"ގެ ނަމުގައި އެންމެހައި ދިވެހިރައްޔިތުންނަށް މަރުޙަބާ ދެންނެވުމަށާއި ޝުކުރު އަދާކުރުމަށް މިރޭ ޚާއްޞަ ޖަލްސާއެއް ބޭއްވުމަށް ނިންމާފައިވާ ކަމަށެވެ. މިގޮތުން، މިޖަލްސާ އޮންނާނީ، މިރޭގެ 8:30ގައި އާޓިފިޝަލް ބީޗުގައި ކަމަށް އެޕާޓީން ވަނީ ބުނެފައެވެ. އަދި މިޖަލްސާގައި ބައިވެރިވުމަށް އާއްމުކޮށް އެންމެންނަށް އެޕާޓީން ވަނީ ދައުވަތު ފޮނުވާފައެވެ.

އިއްޔެ ބޭއްވި ރައްޔިތުންގެ މަޖިލީހުގެ އިންތިޚާބުގައި ޕީއެންސީން ވަނީ، މިހާތަނަށް ސާފު ކުރެވުނު ވަގުތީ ނަތީޖާއަށް ބަލާއިރު 71 ގޮނޑިއާއެކު މަޖިލީހުގެ ސުޕަރ މެޖޯރިޓީ ހޯދާފައެވެ. މިއީ މިހާތަނަށް ރާއްޖޭގެ ބަރުލަމާނީ ޙަޔާތުގައި ފެނިގެން ދިޔަ އެންމެ ތަފާތު ބޮޑު އަދި ތާރީޚީ ނަތީޖާއެވެ.