މިއަދު ބޭއްވި ރައްޔިތުންގެ މަޖިލީހުގެ އިންތިޚާބުގައި އެމްޑީޕީއަށް ލިބުނު ބޮޑު ނާކާމިޔާބީ ޤަބޫލުކުރައްވައި، އެމްޑީޕީގެ ޗެއާޕަރސަން ފައްޔާޒު އިސްމާއީލް ޕީއެންސީއަށް މަރުހަބާ ވިދާޅުވެއްޖެއެވެ.

އެކްސްގައި ފައްޔާޒު ކުރެއްވި ޓްވީޓުގައި ވަނީ، ރައްޔިތުންގެ މަޖިލީހުގެ އެކި ދާއިރާތަކަށް އެމްޑީޕީގެ ޓިކެޓްގައި ވާދަކޮށް ކާމިޔާބު ހޯއްދެވި މެމްބަރުންނަށް މަރު ހަބާ ވިދާޅުވެފައެވެ. އަދި ޕީއެންސީ މި އިންތިޚާބުގައި ހޯދި ބޮޑު ކާމިޔާބީ ފާހަގަކުރައްވައި ފައްޔާޒު ވަނީ ޕީއެންސީއަށްވެސް ޝުކުރު އަދާކުރައްވާފައެވެ.

ފައްޔާޒް ވިދާޅުވީ،  އެމްޑީޕީން ޑިމޮކްރެޓިކް އަސާސްތައް ކުރިއެރުވުމަށާއި ޒިންމާދާރު އިދިކޮޅު ފަރާތެއްގެ ހައިސިއްޔަތުން ޖަވާބުދާރީ ކުރުވުމަށާއި ސަރުކާރާއެކު މަސައްކަތް ކުރުމުގައި އެމްޑީޕީގެ މެމްބަރުން ތައްޔާރަށް ތިއްބަވާނެކަމަށެވެ.

ޕީއެންސީން ހޯދި ކާމިޔާބީއަށާއި އެމްޑީޕީގެ މެމްބަރުން ހޯދި ކާމިޔާބީއަށް އެމްޑީޕީގެ ރައީސް ޢަބުދުﷲ ޝާހިދުވެސް ވަނީ މަރުހަބާ ވިދާޅުވެފައެވެ.

މިހާތަނަށް ސާފުވި ނަތީޖާތަކަށް ބަލާއިރު، ސަރުކާރު ހިންގާ ޕާޓީ ޕީއެންސީން ވަނީ ރައްޔިތުންގެ މަޖިލީހުގެ ސުޕަރ މެޖޯރިޓީ ހޯދާނޭ ކަމަށް ބެލެވިފައެވެ.