ރައްޔިތުންގެ މަޖިލީހުގެ މިހާރުގެ ރައީސް، ހިތަދޫ އުތުރު ދާއިރާގެ މެންބަރު، މުޙައްމަދު އަސްލަމްގެ ގޮނޑި ދިފާއު ނުކުރެވި، 4 ދައުރަށްފަހު މަޖިލިސް އިންތިހާބުގައި އަސްލަމަށް ނާކާމިޔާބީއާ ކުރިމަތިލާން ޖެހިއްޖެއެވެ.

އިންތިހާބުގެ ވަގުތީ ނަތީޖާ ދައްކާގޮތުން، މި ގޮނޑި ކާމިޔާބު ކުރީ ވެރިކަން ކުރާ ޕީއެންސީގެ ކެނޑިޑޭޓު، މުޙައްމަދު ސިނާނުއެވެ. މި ދާއިރާއަށް ޖުމްލަ 7 ކެނޑިޑޭޓުން ވާދަކޮށްފައިވާއިރު، ސިނާނަށްފަހު ދެން އެންމެ ގިނަ ވޯޓު ލިބިފައިވަނީ އަސްލަމަށެވެ.

ހިތަދޫ އުތުރު ދާއިރާއަށް ވާދަކުރާ 7 ކެނޑިޑޭޓުންގެ ތެރޭގައި ހިމެނެނީ، ޕީއެންސީ އާއި އެމްޑީޕީގެ އިތުރުން، ޑިމޮކްރެޓްސްގެ ކެނޑިޑޭޓަކާއި އަމިއްލަ ގޮތުން ވާދަކުރާ 4 ކެނޑިޑޭޓެކެވެ.

ނަވާރަ ވަނަ ރައްޔިތުންގެ މަޖިލީހުގައި އައްޑޫ ސިޓީގެ 7 ދާއިރާއަށް ވެސް އިންތިހާބުވީ އެމްޑީޕީގެ ކެނޑިޑޭޓުންނެވެ. ނަމަވެސް މިތަނުން 4 މެންބަރަކުވަނީ ފަހުން ޕާޓީ ބަދަލުކުރައްވާފައެވެ. އެގޮތުން ހުޅުދޫ ދާއިރާގެ މެންބަރު އިލްޔާސް ލަބީބް އަދި ހިތަދޫ މެދު ދާއިރާގެ މެންބަރު އަޙުމަދު ރަޝީދު ބަދަލުވެފައިވަނީ ދަ ޑިމޮކްރެޓްސްއަށެވެ. އަދި ފޭދޫ ދާއިރާގެ މެންބަރު މުޙައްމަދު ނިހާދު އާއި މަރަދޫ ދާއިރާގެ މެންބަރު އިބްރާޙިމް ޝަރީފް ބަދަލުވެފައިވަނީ ޕީއެންސީއަށެވެ.