މިއަދު ބާއްވާ ރައްޔިތުންގެ މަޖިލީހުގެ އިންތިޚާބަށް އިލެކްޝަންސް ކޮމިޝަނުން ވަނީ ފުރރިހަމައަށް ތައްޔާރުވެފައި ކަމުގައި އެކޮމިޝަނުގެ ރައީސް ފުވާޑު ތައުފީޤު ވިދާޅުވެއްޖެއެވެ.

އިންތިޚާބުގެ ކަންކަމާއި ގުޅޭ ގޮތުން ގުޅުން ހުރި އެހެން މުއައްސަސާތަކާއި އެކު ދަރުބާރުގޭގައި، ހޮނިހިރު ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި، ފުވާދު ވިދާޅުވީ، އިންތިޚާބަށް ވާންޖެހޭ ތައްޔާރީތައް ހޮނިހިރު ދުވަހުގެ ރެއާއި ހަަމައަށް ނިންމާލެވިފައިވާ ކަމަށެވެ. މިގޮތުން ރާއްޖެއިން ބޭރުގެ ތިން ޤައުމެއްގައި ވޯޓު ފޮށިތައް ބަހައްޓާއިރު އެޤައުމުތަކަށާއި، އަދި އަތޮޅު ތެރޭގެ ހުރިހާ ރަށަކަށްވެސް ވޯޓު ފޮށިތަކާއި، ވޯޓު ކަރުދާހާއި އެހެނިހެން ލިޔެކިޔުންތައް ފޮނުވިފައިވާ ކަމުގައި ފުވާދު ވިދާޅުވިއެވެ.

ފުވާދު ވިދާޅުވީ، މާލޭގައިވެސް ހެނދުނު 7:30ގައި ވޯޓުލާ މަރުކަޒުތަކުގެ މަސައްކަތްތައް ފަށާނޭ ކަމަށެވެ. މިގޮތުން 8 ޖަހާއިރު ވޯޓުލުން ފެށުމަށް ޓަކައި 7:30 އިން ފެށިގެން ސިޓީ އުރަތައް ކަނޑައި އިދާރީ ގޮތުން ކުރަންޖެހޭ ކަންތައްތައް ކުރަން ފަށާނޭ ކަމުގައިވެސް ފުވާދު ވިދާޅުވިއެވެ.

ފުވާދު ވިދާޅުވީ އެކަމުގައި އެންމެހައި ރައްޔިތުންގެ އެއްބާރުލުން ދެއްވުމަށްވެސް އެމަނިކުފާނު އެދިވަޑައިގަންނަވާ ކަމަށެވެ. އަދި ކެންޑިޑޭޓުންގެ މަންދޫބުންނާއި، ކޮންމެ ޕާޓީއަކުންވެސް މަންދޫބަކު ކޮންމެ ވޯޓުފޮއްޓެއްގެ ކައިރީގައިވެސް ބެހެއްޓޭނެކަމުގައި ފުވާދު ވިދާޅުވިއެވެ. އެހެން ނަމަވެސް އެއް މީޑިއާއަކަށް ނިސްބަތްވާ މޮނީޓަރުންގެ ތެރެއިން ދެމީހުންނަށް އެއްވަގުތެއްގައި އެއްފޮއްޓެއްގެ ދޮށުގައި ތިބެވޭނެ ކަމުގައިވެސް ފުވާދު ވިދާޅުވިއެވެ.