އިއްޔެ ހަވީރު މަހަށް ފުރިފަހުން ޚަބަރެއް ނުވާތީ ހޯދަމުންދާ، ފަރިހި 2 ނަމަކަށް ކިޔާ ޑައިވިން ދޯނީގައި 3 މީހުން މަހަށް ގޮސްފައިވާ ކަމުގައި އެމްއެންޑީއެފުން ވިދާޅުވެއްޖެއެވެ.

އެންމެ ފުރަތަމަ މައުލޫމާތު ލިބުނީ އެދޯނިން މަހަށް ދިޔައީ ދެމީހުންކަމަށެވެ. އެހެން ނަމަވެސް އިތުރު އެހެން މީހަކުވެސް އެދޯނީގައި ދިޔަކަމަށް އެމްއެންޑީއެފުން ހާމަކުރެއްވީ މިއަދު ހެނދުނުއެވެ.

އިއްޔެ ހަވީރު މ. މަޑުއްވަރިން ދޯންޏެއްގައި މަހަށް ދިޔަ ދެ މީހަކު ހަބަރެއްނުވެ ވީނުވީއެއް ނޭނގި ގެއްލިފައިވާކަމަށް ފުލުހުންނަށް ރިޕޯޓްކޮށްފައި ވަނީ، ރޭގެ 22:06 ހާއިރުގައެވެ. އަދި ރޭގެ 22:45 ހާއިރު ފުލުހުން އެމްއެންޑީއެފަށް ރިޕޯޓްކޮށް އެދޯންޏާއި މީހުން ހޯދުމުގެ މަސައްކަތް ވަނީ ފަށާފައެވެ.

Advertisement

ގެއްލުނު ދޯންޏާއި މީހުން ހޯދުމަށް، ދާދިފަހުން ވައިގެ އަސްކަރިއްޔާގައި ބޭނުން ކުރި ޑްރޯންވެސް ރޭ ވަނީ ގެއްލުނު މީހުން ހޯދުމަށް އުދުއްސަން ފަށާފައި ކަމަށާއި، މުލީގައި އޮންނަ ކޯސްޓްގާޑް ހާބަރކްރާފްޓް 114 ވެސް އެދޯނި ހޯދުމުގެ މަސައްކަތުގައި ހަރަކާތްތެރިވަމުންދާކަމުގައި އެމްއެންޑީއެފުން ވަނީ ވިދާޅުވެފައެވެ.

މިހާތަނަށް ކުރި މަސައްކަތުން އަދި އެދޯނި ފެނިފައެއް ނުވެއެވެ.