ދިވެހިވެރިކަން ހަމަމަގުގައި، މީޒާނުގައި ހިފަހައްޓާނޭ ތަނަކީ، ރައްޔިތުންގެ މަޖިލިސް ކަމަށާއި އެއީ ދިވެހި ވެރިކަމުގެ ނާރެސް ކަމުގައި، ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، އެމްޑީޕީގެ ތެރޭގައި ވަކިފެކްޝަނެއް ހައްދަވައިގެން އުޅުއްވުމަށްފަހު، އެމްޑީޕީއާ ވަކިވެ އެބޭފުޅުން އުފެއްދެވި ޕާޓީގެ މަޖިލިސް އިންތިޚާބުގެ ކެމްޕޭނުގެ ތެރެއިން ރޭ ރާޅުގަނޑުގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ. ނިސްބަތުން ވަރަށް މަދު ބަޔަކު ތިބި މި ޖަލްސާގައި ރައީސް ނަޝީދު ވަނީ، ސަރުކާރަށާއި އެމްޑީޕީއަށްވެސް ފާޑު ވިދާޅުވެ ވާހަކަފުޅު ދައްކަވާފައެވެ.

ރައީސް ނަޝީދު ވިދާޅުވީ 20 ވަނަ ރައްޔިތުންގެ މަޖިލީހާއި ކުރިމަތިލާއިރު، ދިވެހިރާއްޖެ މިވަނީ ހަލަބޮލިކަމުގެ ތެރޭގައި ކަމަށެވެ. އަދި ދިވެހިރާއްޖެ މިވަނީ ހާސްކަމާއި ޝައްކުގައި ކަމަށްވެސް ރައީސް ނަޝީދު ވިދާޅުވިއެވެ. މިގޮތުން ދިވެހި ދައުލަތުގެ ދަރަނި ބޮޑުވެ ބައިނަލްއަޤުވާމީ އިދާރާތަކުން ކަންބޮޑުވާ ހާލަތަށް ގޮސްފައިވާ ކަމުގައިވެސް ރައީސް ނަޝީދު ވިދާޅުވިއެވެ.

ރައްޔިތުންގެ މަޖިލީހުގެ އިންތިޚާބަށް ދަ ޑިމޮކްރެޓްސްއިން ކުރިޔަށް ގެންދާ ކެމްޕޭނުގައި ބައިވެރިވެވަޑައިގެންނެވުމަށް ރައީސް ނަޝީދު ރާއްޖެވަޑައިގެންނެވީ، ބުރާސްފަތި ދުވަހުއެވެ. އެމަނިކުފާނު ވަނީ އިއްޔެ ހަވީރުވެސް ވިލިމާލޭގައި ބޭއްވި ޑިމޮކްރެޓްސްގެ އިވެންޓެއްގައި ބައިވެރިވެވަޑައިގެންފައެވެ.