މ. މަޑުއްވަރިން ދޯންޏެއްގައި ފަރުމަހުގެ މަސްވެރިކަމަށް ނުކުތް ދެމީހަކު ގެއްލިގެން ހޯދަން ފަށައިފިއެވެ.

ފުލުހުންގެ އިދާރާއިން ވިދާޅުވީ، މިއަދު ހަވީރު މ. މަޑުއްވަރިން ދޯންޏެއްގައި މަހަށް ދިޔަ ދެ މީހަކު ހަބަރެއްނުވެ ވީނުވީއެއް ނޭނގި ގެއްލިފައިވާކަމަށް ފުލުހުންނަށް ރިޕޯޓްކޮށްފައި ވަނީ، މިރޭގެ 22:06 ހާއިރު ކަމަށެވެ. 

އެމްއެންޑީއެފުން ވިދާޅުވީ، ދޯނި ގެއްލިގެން އުޅޭ ކަމުގެ މައުލޫމާތު ފުލުހުން އެމްއެންޑިއެފަށް ފޯރުކޮށްދީފައި ވަނީ މިރޭގެ 22:45 ހާއިރުގައި ކަމަށެވެ. އެމްއެންޑީއެފުން ބުނީ، ފަރިހި 2 ނަމަކަށް ކިޔާ އެދޯންޏަކީ ޑައިވިން ދޯންޏެއް ކަމަށާއި، އެދޯނީގައި އެދެމީހުން މަސްވެރިކަމަށް ނުކުމެފައި ވަނީ މ. ރަތްމަންދޫ ކައިރިއަށް ކަމަށެވެ. އަދި އެދޯނި ފުރާފައި ވަނީ މިރޭގެ 8 ޖަހާއިރު އަންނަ ގޮތަށް ކަމަށް ވެސް މައުލޫމާތު ލިބިފައިވާ ކަމަށް އެމްއެންޑީއެފުން ބުންޏެވެ. 

އެނގިފައިވާ ގޮތުގައި ދޯނި ގެއްލުނު ކަމަށް ރިޕޯޓު ކުރީ މަހަށްފުރި މީހުން އެނބުރިއައުމަށް ކަނޑައެޅި ގަޑިއަށް އައިސްފައި ނުވާތީއެވެ.

ފުލުހުންގެ އިދާރާއިން ވިދާޅުވީ، އެ ހާދިސާގެ މަޢުލޫމާތު ފުލުހުންނަށް ލިބުމާއެކު މ. އަތޮޅު ފުލުހުންގެ ލޯންޗު ދަނީ ދޯންޏާއި މީހުން ހޯދުމުގެ މަސައްކަތުގައި ހަރަކާތްތެރިވަމުން ކަމަށެވެ. އެމްއެންޑީއެފުން ވިދާޅުވީ، އެމްއެންޑީއެފް ސެންޓުރަލް އޭރިއާ ކޮމާންޑް ، ކޯސްޓްގާޑު ތާޑް ސުކޮޑްރަން އިންވެސް އެ ދޯނި ހޯދުމުގެ މަސައްކަތް ކުރަމުންދާ ކަމަށެވެ.