ވަޢުދުތައް ފުއްދަމުން ނުގެންދާތީ މިސަރުކާރާއި މެދު ރައްޔިތުން ތިބީ މިސަރުކާރާއި މެދު މާޔޫސް ވެފައި ކަމަށާއި، ސަރުކާރު ޖަވާބުދާރީ ކުރެވޭނީ އެމްޑީޕީއަށް މަޖިލީހުގެ މެޖޯރިޓީ ލިބިގެން ކަމުގައި، ކުރީގެ ރައީސް އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، އާދީއްތަ ދުވަހު ބާއްވާ ރައްޔިތުންގެ މަޖިލީހުގެ އިންތިޚާބަށް އެމްޑީޕީން ކުރިޔަށް ގެންދާ އެޕާޓީގެ މިސްރާބު ހަމަ މަގަށް ކެމްޕެއިންގެ މަގުމަތީ ހަރަކާތްތައް ނިންމާލުމުގެ ގޮތުން ކުރިޔަށް ގެންތިޔަ ރެލީ ނިންމާލުމަށް ފަހު އާޓިފިޝަލް ބީޗުގައި އެމްޑީޕީގެ މެމްބަރުންނާއި އެކު ބޭއްވެވި ބައްދަލުކުރެއްވުމުގައި ވާހަކަފުޅު ދައްކަވަމުންނެވެ.

ރައީސް ޞާލިޙް ވިދާޅުވީ، މަޖިލިސް އިންތިޚާބުގެ ކެމްޕޭނަށް ވަޑައިގެންނެވި ކޮންމެ ރަށަކުންވެސް ރައްޔިތުންގެ ކިބައިން ފެނިގެން ދިޔައީ މިސަރުކާރުން މަޝްރޫޢުތައް ހުއްޓާލާފައި ވާތީ މާޔޫސްވެފައިވާ މަންޒަރުކަމަށެވެ. އަދި މިސަރުކާރުން ވަނީ ރައްޔިތުންނަށް ކަންކަން އޮޅުވާލައި ދޮގު ހަދާފައި ކަމުގައިވެސް ރައީސް ޞާލިޙް ވިދާޅުވިއެވެ. ރައީސް ޞާލިޙް ވިދާޅުވީ ސަރުކާރު ޖަވާބުދާރީ ކުރެވޭނީ އެމްޑީޕީއަށް ކަމަށެވެ. އަދި އެމްޑިޕީގެ ކެންޑިޑޭޓުން މަޖިލީހަށް އިންތިޚާބުވެއްޖެ ނަމަ ސަރުކާރު ޖަވާބުދާރީ ކުރުވާނެ ކަމުގައިވެސް ރައީސް ޞާލިޙް ވިދާޅުވިއެވެ.

Advertisement

ރައީސް ޞާލިޙް ވިދާޅުވީ މިސަރުކާރާއި މެދު ކަންބޮޑުވާންޖެހޭ އެތައް ކަމެއް އެބަހުރި ކަމަށެވެ. އޭގެ ތެރޭގައި ދައުލަތުގެ ރިކަރަންޓް ޚަރަދު ބޮޑުވުމާއި، އެތައްހާސް ސީޔާސީ މަޤާމްތަކެއް އުފެއްދެވުމާއި، ދައުލަތގެ މާލީ ހިސާބުތައް ހާމަ ކުރަމުން ނުދިޔުން އޭގެ ތެރޭގައި ހިމެނޭ ކަން ރައީސް ޞާލިޙް ފާހަގަ ކުރެއްވިއެވެ.

ރައީސް ޞާލިޙް ވިދާޅުވީ، ދިމިޤުރާތީ ހަމަތަކުގެ މަތިން ވެރިކަމަށް އަންނަ ބަޔަކު ވެރިކަން ކުރަންޖެހޭނީ، ރައްޔިތުން އެދޭ ގޮތަށް އަދި ހާމަކަން ބޮޑު ގޮތެއްގައި ކަމަށެވެ. އެހެން ނަމަވެސް ސަރުކާރުން ކަންކަން ރައްޔިތުންނަށް އޮޅުވާލައި ދޮގު ހަދަމުންދާކަން ރައީސް ޞާލިޙް ވަނީ ފާހަގަކުރައްވާފައެވެ. އަދި ސަރުކާރު ހިންގާ ޕާޓީގެ ކެމްޕޭނަށް ދައުލަތުގެ މުދަލާއި ފައިސާ ބޭނުން ކުރަމުންދާ ކަމަށާއި މިހާތަނަށް 100 މިލިޔަނަށްވުރެ ގިނަ ރުފިޔާ އެގޮތަށް ބޭނުންކޮށްފައިވާކަމުގައިވެސް ރައީސް ޞާލިޙް ވިދާޅުވިއެވެ.

20 ވަނަ ރައްޔިތުންގެ މަޖިލީގުގެ މެޖޯރިޓީ ހޯދުމަށް ސަރުކާރުން ގެންދަނީ މަސައްކަތް ކުރަމުންނެވެ. މިގޮތުން މި ދެތިން ދުވަހު ސަރުކާރުން ގެންދަނީ މާލެ ސަރަހައްދާއި އަތޮޅުތަކުގައި އައު އެތައް މަޝްރޫޢެއް އިއުލާނުކުރަމުންނެވެ.